Талаба якка тартибдаги тадбиркорлик фаолияти билан шуғулланмоқчи. Талабалар учун қандайдир имтиёзлар борми?
С.Давлатова.
– Амалдаги қонун ҳужжатларида бевосита талабалар – якка тартибдаги тадбиркорлар учун имтиёзлар мавжуд эмас.
Касб-ҳунар коллежлари битирувчилари учун имтиёзлар бор. Улар коллежни тамомлагандан кейин 12 ой ичида ЯТТ сифатида давлат рўйхатидан ўтган тақдирда, қатъий белгиланган солиқни тўлашдан 6 ой муддатга озод этилади. Касб-ҳунар коллежи битирувчиси – ЯТТ фаолиятини тугатган ёки уни 3 ва ундан кўп ойга тўхтатган тақдирда, қатъий белгиланган солиқни фаолиятни амалга оширган бутун давр учун тўлашига тўғри келади (Солиқ кодексининг 375-моддаси 6-қисми).
Яна бир имтиёз – янги рўйхатдан ўтган юридик шахс ташкил этмаган ЯТТ ва оилавий тадбиркорлик субъектларига ЭКИҲнинг 20 баробаригача миқдорда микрокредитлар ажратиш бўйича соддалаштирилган механизмнинг жорий этилиши. Тадбиркорлик фаолиятини амалга ошириш учун олинган товарлар кредит бўйича гаров сифатида ҳисобга олиниши мумкин.
Янги рўйхатга олинган (2021 йил 1 январга қадар) юридик шахс ташкил этмаган ЯТТ ва оилавий тадбиркорлик субъектлари белгиланган фаолият турлари билан шуғулланаётган бўлса, микрокредитларни расмийлаштиришда 6 ой муддатга қатъий белгиланган солиқ тўловларидан озод этилади. Фаолият турлари рўйхати 17.03.2017 йилдаги ПҚ-2844-сон қарорга 1-иловада келтирилган.
Имтиёзлардан фойдаланадиган қатъий белгиланган солиқ тўловчилар:
1) улар давлат рўйхатига олинган кундан эътиборан 12 ой ичида тугатилса;
2) 3 ёхуд ундан кўп ой муддатга фаолиятини тўхтатса, фаолият кўрсатган даври учун қатъий белгиланган солиқларни тўлайди (ПҚ-2844-сон қарорнинг 1, 2-бандлари).
Александр ЛОБАНОВ,
«Norma Online» эксперти.