Ходимимизнинг қизи (20 яшар) олий ўқув юртига «суперконтракт» бўйича ўқишга кирди. У бўйича 66 млн сўм тўлаши зарур. Корхона кейинчалик иш ҳақидан ушлаб қолган ҳолда ходимга қарз бериши мумкин.
«Суперконтракт» суммасига ЖШДС бўйича имтиёз қўлланадими?
Ф.О.
– ЖШДС бўйича имтиёз ўқиш учун контракт суммасидан қатъи назар қўлланади.
Фуқароларнинг иш ҳақи ва бошқа даромадлари фарзандининг Ўзбекистон олий ўқув юртларида ўқиши учун контракт ҳақини тўлашга йўналтирилганда солиқ имтиёзлари қўлланиши:
● Солиқ кодекси (Солиқ кодексининг 179-моддаси 31-банди);
● Ўзбекистон Республикаси олий ўқув юртларида таълим олиш учун йўналтириладиган маблағларга жисмоний шахслардан олинадиган даромад солиғи бўйича имтиёзни қўллаш тартиби тўғрисидаги низом (АВ томонидан 27.05.2010 йилда 2107-сон билан рўйхатдан ўтказилган) билан тартибга солинади.
Фуқароларнинг даромадлари ЎзР олий ўқув юртларида таълим олиш (ўзининг ўқиши ёки 26 ёшга тўлмаган фарзандларининг ўқиши) учун ҳақ тўлашга йўналтирилган бўлса, солиқ солишдан озод қилинади. ЖШДС бўйича имтиёзни қўллаш учун таълим ҳақини тўлашга йўналтириладиган маблағларнинг чекланган суммаси чекланмайди.
Таълим ҳақини тўлаш шакли – «суперконтракт» 2017–2018 ўқув йилидан бошлаб қўлланмоқда. Шу муносабат билан солиқ солиш тўғрисидаги амалдаги қонун ҳужжатларига қандайдир ўзгартиришлар киритилмади. Бинобарин, контракт суммаси ЖШДС бўйича имтиёздан фойдаланишга тўсқинлик қила олмайди, уни амалдаги қонун ҳужжатларига мувофиқ қўллаш мумкин.
Талабанинг отаси оладиган жами йиллик даромад суммаси таълим ҳақи суммасидан (66 млн сўм) кам бўлса, у солиқ чегирмасини тўлиқ қўллай олмайди. Қолган суммага чегирмани талабанинг онаси бериши мумкин.
Солиқ чегирмасининг қолдиғи кейинги солиқ даврларига кўчирилмайди (Низомнинг 8-банди).
Ноила МУҚМИНОВА, «Norma Online» эксперти.
