Корхона 2018 йилда омбор учун дизель юк ортгични лизингга олди. Юк ортгич нархи – 107 млн сўм, лизинг маржаси – 35 млн сўм. 2018 йилда ЯСТ тўловчиси эдик. Солиқ кодексининг 356-моддасига мувофиқ солиқ солинадиган базани янги технологик ускуналарни олишга йўналтириладиган маблағлар суммасига камайтиришимиз мумкин экан.
ЯСТ бўйича солиқ солинадиган базани қандай суммага камайтиришимиз мумкин – юк ортгич нархигами ёки ҳар ойда график бўйича тўланган лизинг тўловлари суммасигами?
– Корхона ЯСТ бўйича солиқ солинадиган базани янги технологик асбоб-ускуналар олишга йўналтириладиган маблағлар суммасига камайтириш тарзидаги имтиёзни қўллаши мумкин (Солиқ кодексининг 356-моддаси 3-қисми). Имтиёз маблағлар манбаидан (ўз маблағлари ёки қарзга олинган маблағлар, шу жумладан лизинг) қатъи назар, берилади (АВ томонидан 25.08.2017 йилда 2918-сон билан рўйхатдан ўтказилган Низомнинг 12-банди).
Молиявий ижарада, ижара (лизинг) тўловлари ижарага берувчи (лизингга берувчи)га молиявий ижара объекти қийматининг ижарачи (лизингга олувчи) томонидан қопланишидан ҳамда ижарага берувчи (лизингга берувчи)нинг фоизли даромадидан иборат бўлади (АВ томонидан 24.04.2009 йилда 1946-сон билан рўйхатдан ўтказилган 6-сон БҲМСнинг 28-банди). Ижарачи (лизингга олувчи) томонидан амалга оширилган молиявий ижара объектини сотиб олиш, етказиб бериш ёки белгиланган мақсадда фойдаланиш учун яроқли ҳолга келтириш билан боғлиқ харажатлар молиявий ижара объектининг қийматига қўшилади (6-сон БҲМСнинг 31-банди).
Бунда лизинг маржаси ҳисобга олинмайди, чунки у лизинг олувчининг фоизлик харажати ҳисобланади (АВ томонидан 1.06.2009 йилда 1961-сон билан рўйхатдан ўтказилган Низомнинг 23-банди).
Шу тариқа, дизель юк ортгич янги бўлса (ишлаб чиқарилганига 3 йилдан ошмаган), имтиёзни уни харид қилинган суммага қўллашингиз мумкин, ушбу суммага харид қилиш билан боғлиқ барча харажатлар қўшилади. Лизинг маржаси юк ортгичнинг харид қийматида ҳисобга олинмайди.
Жавобни «Norma» МЧЖ экспертлари тайёрладилар.
