Турмуш ўртоғим май ойида вафот этиб, ушбу ой учун тегишли пенсияни олишга улгурмади. Мен ҳозир уни олиш учун мурожаат қилишим мумкинми?
З.Гаева.
Тошкент шаҳри.
– 252-сон Низомнинг 175-бандига кўра, пенсионерга берилиши керак бўлган ва унинг вафоти муносабати билан олинмай қолган пенсия суммаси мерос таркибига киритилмайди ва боқувчисини йўқотганлик пенсияси билан таъминланадиган шахслар доирасига тегишли оила аъзоларига тўланади. Ота-оналар, эри (хотини), шунингдек пенсионер вафот этган кунда у билан бирга яшаган оила аъзолари, агар улар боқувчисини йўқотганлик бўйича пенсия билан таъминланадиганлар доирасига кирмаган тақдирда ҳам ушбу суммаларни олиш ҳуқуқига эга. Пенсионер вафот этган ой учун олинмаган пенсия суммаси уларга унинг вафотигача ушбу ойнинг кунлари учун тўланади.
Оиланинг бир неча аъзолари мурожаат қилган тақдирда, уларга берилиши керак бўлган пенсия суммаси улар ўртасида тенг тақсимланади. Кўрсатиб ўтилган сумма, унинг учун пенсионер вафот этгандан сўнг 6 ойдан кечикмай мурожаат қилинган тақдирда тўланади.
