Киритилган ўзгартиришлар билан юқорида кўрсатилган объектларда ҳарбий хизматни ўтаган пенсия ёшидаги шахслар ҳар йили Меҳнат ва аҳолини ижтимоий муҳофаза қилиш вазирлигининг санаторийларига бепул йўлланмалар билан таъминланиши аниқлаштирилди. Йўлланмани бериш тартиби аввалгидек қолди: ишлаётган шахслар учун иш жойи бўйича Ўзбекистон Касаба уюшмалари Федерацияси Кенгашининг ижтимоий суғурта бюджети маблағлари ҳисобига, ишламаётганлар учун эса тиббий кўрсатмалар мавжуд бўлганда бандликка кўмаклашиш ва аҳолини ижтимоий муҳофаза қилиш марказлари орқали давлат бюджети маблағлари ҳисобига амалга оширилади.
Ҳужжат билан тасдиқланган, Ядро полигонларида ва бошқа радиация-ядро объектларида ҳарбий хизматни ўтаган, Ўзбекистон Республикаси ҳудудида яшаётган Ўзбекистон Республикаси фуқароларининг янгиланган рўйхатига 263 киши киритилган.
Тасдиқловчи ҳужжатлар мавжуд бўлганда, Мудофаа вазирлиги, Ички ишлар вазирлиги ва Молия вазирлигига мазкур Рўйхатга ўзгартириш ва қўшимчалар киритиш ҳуқуқи берилди. Бунинг учун Рўйхатни шакллантириш тартиби тўғрисидаги низом ишлаб чиқилиб тасдиқланади.
Елена ЕРМОХИНА,
«Norma Profi» эксперти.
