23.09.2016 йилдаги ЎРҚ-411-сон Қонун билан Маъмурий жавобгарлик тўғрисидаги кодексга йўл ҳаракати хавфсизлигига тааллуқли бир қатор ўзгартириш ва қўшимчалар киритилди.
Эндиликда нафақат мотоцикллар ҳайдовчилари, балки мопедлар ҳайдовчиларининг мотошлемлардан фойдаланиш қоидаларига риоя этмаслиги ЭКИҲнинг 1/5 қисми миқдорида жарима солишга сабаб бўлади (МЖТКнинг 125-моддаси 1-қисми).
Пиёдалар йўлнинг қатнов қисмида, шу жумладан пиёдалар ўтиш жойида ҳаракатланаётганда телефондан фойдаланиши, китобларни ёки даврий нашрларни ўқиши, видеоматериалларни томоша қилиши ҳамда аудиоматериалларни эшитиши, шунингдек эътиборни чалғитадиган бошқа электрон воситалардан фойдаланиши ЭКИҲнинг 1/3 қисми миқдорида жарима солишга сабаб бўлади (МЖТКнинг 138-моддаси 1-қисми).
Транспорт воситаси ҳаракатланаётган вақтда йўловчи томонидан тана қисмларини (қўлдан ташқари) салондан чиқариш ЭКИҲнинг 1 баравари (149 775 сўм) миқдорида жарима солишга сабаб бўлади (МЖТКнинг 138-моддаси 4-қисми).
Елена Ермохина,
«Norma Online» эксперти.
