Юртимизда болалар ўйинчоқлари хавфсизлигини таъминлаш борасида кенг кўламли ишлар амалга оширилмоқда. Чунки ўйинчоқлар нафақат ташқи кўриниши билан, балки кимёвий таркиби, гигиеник сифати билан ҳам келажагимиз эгаларига зиён етказмаслиги керак.
Амалдаги тартибларга кўра республикамизга олиб кирилаётган болалар ўйинчоқлари ва ўйинлар мажбурий тартибда сертификатланадиган товарлар сирасига киради. Яъни бу турдаги товарларнинг божхона расмийлаштируви жараёнида гигиеник ва мувофиқлик сертификатлари талаб этилади. Қолаверса, республикамизга олиб кирилаётган болалар ўйинчоқлари давлат тилида маркаланиши зарур.
Афсуски мазкур тартибларга риоя қилмасдан туриб, сифати кафолатланмаган ва тегишли ҳужжатлари бўлмаган ўйинчоқларни юртимизга олиб киришга уринишлар учраб туради. Яқинда пойтахт божхона ходимлари томонидан шу турдаги бир нечта божхона қоидабузарликлари фош қилинди.
Жумладан, Тошкент шаҳар божхона бошқармасининг «Тошкент-товар» ТИФ божхона пости ходимлари томонидан пойтахтимизда фаолият юритаётган корхоналардан бирининг номига хориждан темир йўл контейнерида келтирилган юклар ўрнатилган тартибда божхона кўригидан ўтказилганда, мазкур товарларга тегишли божхона юк декларациясида ва йўл-юк кузатув ҳужжатларида қайд қилинмаган, қиймати салкам 4,5 млн сўмлик 6 турдаги 504 дона болалар ўйинчоқлари яширин равишда олиб кирилаётганлиги аниқланди.
Мазкур постда аниқланган шунга ўхшаш яна бир ҳолатда якка тартибдаги тадбиркор номига хориждан келтирилган юкларда божхона юк декларацияси ва бошқа ҳужжатларда қайд қилинган миқдоридан ортиқча бўлган 37,1 млн сўмлик 3 903 дона болалар ўйинчоқлари олиб кирилгани фош бўлди.
Ҳозирда мазкур ҳолатлар юзасидан божхона суриштируви ва текширув жараёнлари бошлаб юборилган.
Жорий йилнинг биринчи ярми мобайнида Тошкент шаҳар божхона бошқармаси ходимлари томонидан ҳуқуқни муҳофаза қилувчи бошқа идоралар вакиллари билан ҳамкорликда аниқланган 455 та қонунбузарлик ҳолатида қиймати салкам 7 млрд сўмлик товар-моддий бойликларнинг ноқонуний олиб ўтилишига чек қўйилди.
Шу ўринда юртдошларимизнинг божхона қоидабузарликлари ёки божхона ходимларининг ноқонуний хатти-ҳаракатлари юзасидан Тошкент шаҳар божхона бошқармасининг 120-76-76 рақамли «Ишонч телефони»га қўнғироқ қилишлари мумкинлигини эслатиб ўтамиз.
Тошкент шаҳар божхона бошқармаси Ахборот хизмати.
