“Фарғона Умид” суғурта агентлиги хусусий кичик корхонамиз умумбелгиланган солиқларни тўловчи корхона ҳисобланади. Амалдаги қонун ҳамда меъёрий ҳужжатларга кўра, Молия вазирлиги ҳузуридаги бюджетдан ташқари Пенсия жамғармаси, Республика йўл жамғармаси ҳамда Таълим ва тиббиёт муассасаларини реконструкция қилиш, мукаммал таъмирлаш ва жиҳозлаш жамғармасига мажбурий ажратмаларни тўлаш бўйича биз учун имтиёзлар назарда тутилганми?
Ғ.Исомиддинов,
корхона бош бухгалтери.
– Солиқ кодексининг 312 ва 316-моддаларида нотижорат ташкилотлар (бундан уларнинг тадбиркорлик фаолиятини амалга оширишдан олган даромадлари мустасно), ягона солиқ тўловини тўловчи юридик шахслар ҳамда умумбелгиланган солиқларни тўловчи микрофирма ва кичик корхоналар (акциз тўланадиган маҳсулотлар ишлаб чиқарувчи ва ер қаъридан фойдаланганлик учун солиқ солинадиган фойдали қазилмаларни қазиб олувчи микрофирма ва кичик корхоналардан ташқари) Молия вазирлиги ҳузуридаги бюджетдан ташқари Пенсия жамғармасига ҳамда Республика йўл жамғармасига мажбурий ажратмаларни тўловчилар ҳисобланмаслиги белгилаб қўйилган.
Таълим ва тиббиёт муассасаларини реконструкция қилиш, мукаммал таъмирлаш ва жиҳозлаш жамғармасига мажбурий ажратмага келсак, Президентнинг 25.12.2012 йилдаги ПҚ-1887-сон қарорига 22-иловада Молия вазирлиги ҳузуридаги бюджетдан ташқари Пенсия жамғармаси, Республика йўл жамғармаси ҳамда Таълим ва тиббиёт муассасаларини реконструкция қилиш, мукаммал таъмирлаш ва жиҳозлаш жамғармасига мажбурий ажратмаларнинг солиш объектлари рўйхати келтирилган бўлиб, унда уларнинг бир хиллигини кўриш мумкин.
Демак, сизнинг корхонангиз акциз тўланадиган маҳсулотлар ишлаб чиқариш ва ер қаъридан фойдаланганлик учун солиқ солинадиган фойдали қазилмаларни қазиб олиш фаолияти билан шуғулланмаган тақдирда, пенсия, йўл ҳамда таълим ва тиббиёт муассасаларини реконструкция қилиш, мукаммал таъмирлаш ва жиҳозлаш жамғармаларига мажбурий ажратмаларни тўламайди.
Жавобни экспертимиз
Умидбек САФАРОВ тайёрлади.
