ЛДПР фракциясининг Леонид Слуцкий бошчилигидаги депутатлар гуруҳи Давлат думасига фарзандларга ўз ота-оналарига пенсия балларини ўтказиш имконини берувчи қонун лойиҳасини киритди.
Шундай қилиб, «Суғурта пенсиялари тўғрисида»ги қонунга ўзгартиришлар киритиш таклиф этилмоқда. Календарь йилга иккитадан кўп бўлмаган пенсия балларини: ҳар бир ота-онага биттадан балл ёки ота-оналардан биттасига икки балл ўтказишга рухсат бериш режалаштирилмоқда. Ота-оналарда кўпайтирилган баллар уларнинг пенсиялари миқдорини ва турмуш даражасини оширади, дейилади тушунтириш хатида.
Депутатларнинг сўзларига кўра, ёшга доир суғурта пенсиясини тайинлаш учун энг кам стаж ва якка тартибдаги пенсия коэффициенти 2025 йилдан бошлаб тегишли равишда 15 йил ва 30 баллни ташкил этади. Лойиҳа муаллифлари таъкидлаганидек, бундай шартлар доирасида пенсияга чиқаётган шахсларни қўшимча қўллаб-қувватлаш талаб этилади.
«Барча пенсия ислоҳотлари ва ўзгаришларни ҳисобга олган ҳолда, баъзи фуқаролар учун ёшга доир пенсия олиш учун минимал 30 баллни тўплаш муаммога айланди», – дея маълум қилади қонун лойиҳаси ташаббускори, Давлат думасида ЛДПР фракцияси раиси ўринбосари Сергей Леонов.
Агар фарзандлар ота-оналари билан балларни бўлишса, улар учун катта зарар бўлмайди, ота ва она учун эса бу муҳим ёрдам бўлади, дейилади тушунтириш хатида. Илгари Давлат думасида ишлаётган пенсионерларнинг пенсия баллари лимитини учдан ўнгача кўтариш ғоясига баҳо берилган эди. Депутатларнинг фикрича, бу иқтисодиётга ижобий таъсир кўрсатади.
Манба: news.mail.ru
Мавзувий сонни махсус мухбиримиз Алла Ромашко олиб боради.