Ягона интерактив давлат хизматлари портали дастурий таъминот – “E-Imzo” ЭРИ модули янгиланганлигини маълум қилди.
Янги дастурий модул Windows (шу жумладан Windows XP) операцион тизимнинг барча янги браузер ва версияларида ишлайди. Ягона порталга ЭРИ* орқали кириш учун зарур бўлган олдин ишлатиладиган otchet.uz браузерига энди эҳтиёж йўқ, сабаби “E-Imzo” ягона дастурий мажмуаси ҳам фойдаланувчини авторизациялашга, ҳам мурожаатни имзолашга имкон яратади. Бундан ташқари, агар аввал ЭРИдан фойдаланиш учун олдиндан очиқ калитни (сертификатни) юклаб олиш талаб қилинган бўлса, “E-Imzo” жорий этилиши билан бунга эҳтиёж қолмади.
Диққат! “E-Imzo” модули фақат Давлат солиқ қўмитаси томонидан берилган ЭРИ калитлари билан ишлайди. Янгиланган калитларни олиш учун Unicon.uz калити фойдаланувчилари яқин жойдаги солиқ инспекциясига мурожаат қилишлари керак бўлади.
ЯИДХП маъмурияти ЭРИ “Жисмоний ва юридик шахсларнинг мурожаатлари тўғрисида”ги Қонунга мувофиқ электрон мурожаатларга юридик куч бериш учун зарур омил эканлигига фойдаланувчиларнинг эътиборини яна бир бор қаратади.
ЭРИ электрон ҳужжатни имзолаган шахсни идентификациялаш учун мўлжалланган бўлиб, ўз қўли билан чекилган имзонинг ўрнини тўлиқ босувчи (худди ўзидек) ҳисобланади ва муаллифликни ҳамда электрон ҳужжатда мавжуд бўлган ахборот ўзгармаслигини тасдиқлаш учун қўлланилади. ЭРИ билан тасдиқланмаган мурожаатлар аноним мурожаатлар деб ҳисобланади (Қонуннинг 6-моддаси).
ЭРИ Давлат солиқ қўмитасининг Янги технологиялар илмий-ахборот маркази ва унинг минтақавий бошқармалари томонидан 2 йил муддатга берилади. ЭРИни ЭКИҲнинг 10%ини тўлаб, яқин жойда жойлашган ДСИдан олса бўлади.
ЭРИни олиш учун қуйидаги ҳужжатларни тақдим этиш керак:
имзоланган ва зарурат бўлганда муҳр билан тасдиқланган ЭРИ калити ва сертификатини олиш тўғрисидаги ариза;
аризада кўрсатилган жисмоний шахс ёки юридик шахс вакилининг паспорти;
ЭРИ калитларини яратиш бўйича хизматларга ҳақ тўланганлиги тўғрисида квитанция.
Қулайлик яратиш мақсадида ЭРИ калитларини рўйхатдан ўтказганлик учун тўловни Click тўлов тизими орқали амалга ошириш ҳам назарда тутилган. Бунинг учун телефонда *880*0113*СТИР*тўлов суммаси # USSD-командасини териш керак бўлади, бунда: СТИР – солиқ тўловчининг идентификация рақами; тўлов суммаси – ЭКИҲнинг 10%и (бугунги кунда – 13 024 сўм).
Click орқали тўлаш бўйича хизматдан фақат жисмоний шахслар ҳамда ДСҚ ва унинг минтақавий бошқармалари томонидан бериладиган ЭРИлар фойдалана олади. Тўловни амалга оширгандан кейин ўзингиз билан ЭРИ калитлари ёзувлари учун алоҳида олиб қўйиладиган ахборот ташувчини (USB-флэшкартасини) олишни унутмаган ҳолда яқин жойда жойлашган ДСИга мурожаат қилиш керак бўлади.
*Электрон рақамли имзо (ЭРИ) – электрон ҳужжатдаги мазкур электрон ҳужжат ахборотини ЭРИнинг ёпиқ калитидан фойдаланган ҳолда махсус ўзгартириш натижасида ҳосил қилинган ҳамда ЭРИнинг очиқ калити ёрдамида электрон ҳужжатдаги ахборотда хатолик йўқлигини аниқлаш ва ЭРИ ёпиқ калитининг эгасини идентификация қилиш имкониятини берадиган имзо.
