I гуруҳ ногирони бўлган онам бошқаларнинг қараб туришига муҳтож. Мен ишдан бўшаб, унга қараб турмоқчиман. Эшитишимча, бундай ҳолларда қараб туриш вақти стажга кираркан. Шу тўғрими?
А.Валеева.
Тошкент шаҳри.
– Ҳа, шундай. Қараб турган шахсга пенсия тайинлаш чоғида иш стажига киритиш учун асос бўлиб қараб туришнинг ҳақиқий ҳолатларини текшириш далолатномаси ҳисобланади. Бунинг учун сиз Пенсия жамғармаси бўлимига мурожаат қилишингиз лозим, унинг ходимлари далолатномани фуқароларнинг ўзини ўзи бошқариш органидан олинган маълумотлар ва қараб турилган шахслардан, шунингдек уларнинг қўшниларидан сўраб чиқиш асосида тузишади. Шунингдек ногиронликда бўлганликни (I гуруҳ ногиронлари ва ногирон болалар учун), ёшни (кексалар ва ногирон болалар учун) тасдиқлайдиган ҳужжатлар ва ўзганинг парвариши зарурлиги тўғрисида (кексалар учун) даволаш муассасасининг тиббий хулосаси керак (Низомнинг 65-банди).
Қараб туришнинг ҳақиқий ҳолатларини текшириш даврийлиги ҳар 12 ойга белгиланади. Бу ҳақдаги далолатномалар I гуруҳ ногирони ёки кексанинг пенсия ишига тикиб қўйилади.
