Далолатнома етарли

Корхонамиз автомашиналарга техник хизмат кўрсатиш билан шуғулланади. Техник хизматларга ҳисобварақ-фактура ёзамиз, сарфлаш материалларини эса бажарилган ишлар далолатномасида кўрсатамиз. Биз уларга ишончнома талаб қилишимиз керакми?

А.Иванова.

– Товар-моддий бойликларни олишга ишончномалар бериш ва уларни ишончномалар бўйича бериш тартиби тўғрисида низомга¹ кўра ишончномалар етказиб берувчи томонидан шартнома ва бошқа битимлар бўйича бериладиган товар-моддий бойлик­ларни олишга берилади (Низомнинг 4-банди).

Ишончли шахс бойликларни олгандан сўнг топшириқ бажарилганлиги ва у олган товар-моддий бойликлар омборга (омборхонага) топширилганлиги тўғрисидаги ҳужжатларни корхона бухгалтериясига ёки тегишли моддий жавобгар шахсга тақ­дим этиши шарт (Низомнинг 8-банди).

Сизнинг ҳолатингизда сар­флаш материалларидан фой­даланилган ишлар (хизматлар) шартнома предмети ҳисобланади. Сизнинг ишларингиз (хизматларингиз) истеъмолчиси уларни ТМБ сифатида кирим қилмайди.

Ҳисобварақ-фактуралар­ни ҳисобга олиш ва расмийлаштириш тартибининг² 16-бан­дида назарда тутилишича, «ишончнома бўйича товар олиш» тўғрисида белги уларнинг ҳақиқатда олинганлиги далолатномалар, маълумотномалар ёки бошқа шундай ҳужжатлар билан тасдиқланадиган бажариладиган ишлар, кўрса­тиладиган хизматлар бўйича тўлдирилмайди.

Сарфлаш материаллари бажарилган ишлар далолатномасида санаб ўтилганли­ги сабабли уларни олишга ишончномани талаб қилиш керак эмас.

¹Молия вазирининг АВ томонидан 27.05.2003 йилда 1245-сон билан рўйхатдан ўтказилган буйруғи билан тасдиқланган.

²МВ ва ДСҚнинг АВ томонидан 22.03.2013 йилда 2439-сон билан рўйхатдан ўтказилган қарорига 3-илова.

Мария САБИРОВА, экспертимиз.