Солиқ тўғрисидаги қонун ҳужжатларида дивидендлар тўлаш бобидаги ўзгаришлар тўғрисида билмоқчи эдим. 2009–2014 йилларда улар бўйича берилган имтиёз узайтирилдими? Агар узайтирилган бўлмаса, энди қанча фоиз ажратиш керак бўлади?
Николай.
– Президентнинг 29.12.2008 йилдаги ПҚ-1024-сон қарорининг 5-бандига кўра:
жисмоний шахсларнинг микрофирма ва кичик корхоналарни таъсис этишдан олинадиган дивиденд тарзидаги даромадлари;
юридик шахсларнинг капиталлаштиришга, инвестицияларга, аввал олинган кредитлар учун ҳисоб-китоб қилишга йўналтирилган маблағлари 5 йил муддатга солиқ солишдан озод этилган эди.
Дивиденд тарзидаги даромадларни солиқ солишдан озод этиш тўғрисида низомда (МВ, ИВ ва ДСҚнинг АВ томонидан 10.02.2009 йилда 1901-сон билан рўйхатдан ўтказилган қарори билан тасдиқланган) кўрсатилишича, ушбу имтиёзлар 2009 йил 1 январдан 2014 йилнинг 1 январигача тўланадиган дивидендларга, улар қайси давр учун ҳисобланганлигидан қатъи назар, татбиқ этилади. 2013 йил учун дивидендлар 2014 йилда ҳисоблаб ёзилганда сиз ушбу имтиёзларни қўллай олмайсиз.
Президентнинг 25.12.2013 йилдаги ПҚ-2099-сон қарорининг 3-банди билан 2014 йил учун Ўзбекистон Республикаси резидентларига дивидендлар ва фоизлар тарзида тўланадиган даромад солиғи ставкаси 10% миқдорида тасдиқланган.
Шуни ҳисобга олиш лозимки, хусусий корхоналар, оилавий бизнес ва фермер хўжаликлари учун имтиёз ўз кучини йўқотмади, сабаби у Президентнинг қарори билан эмас, балки Солиқ кодексининг 179-моддаси 6-банди билан тақдим этилган.
Наталья ЗУЕВА,
экспертимиз.
