Муассис асосий воситаларни, шу жумладан нефть маҳсулотлари учун резервуарларни киритиш орқали устав фондини шакллантирди. Резервуар фойдаланиш даврида тўлиқ эскирган ва яроқсиз ҳолга келган. Корхона раҳбарияти уни ҳисобдан чиқаришга қарор қилди. Ҳисобдан чиқариш пайтида жамланган эскириш 100%ни ташкил этади. Бу устав фондининг камайишига олиб келадими?
– Йўқ, устав фондига ҳисса сифатида киритилган асосий восита тугатилиши натижасида балансдан ҳисобдан чиқарилиши устав фондининг камайишига олиб келмайди.
Устав фондига ҳисса сифатида пул, қимматли қоғозлар, бошқа буюм ёки мулкий ҳуқуқлар ёки пулда баҳоланадиган бошқа шахснинг фойдасига воз кечиладиган ҳуқуқлар киритилиши мумкин. Бундай ҳиссалар корхонага молиявий-хўжалик фаолиятида фойдаланиши учун берилади. Бинобарин, улар реализация қилиш, бошқа шахсларга бериш, тугатиш натижасида балансдан ҳисобдан чиқарилиши мумкин. Бунда устав фонди миқдори ўзгармайди.
Устав фондига ҳисса сифатида киритилган асосий воситани тугатиш натижасида ҳисобдан чиқаришда, корхона балансидан унинг дастлабки қиймати, жамланган эскириш ва қайта баҳолаш сальдоси ҳисобдан чиқарилади. Мазкур операция устав фондини ҳисобга олувчи счётларга тааллуқли бўлмайди ва тегишинча, унинг камайишига олиб келмайди.
Азизахон ТОШХЎЖАЕВА, «Norma» МЧЖ эксперти.