Мен оилавий ҳолатларга кўра ярим йилдан кўпроқ вақт ҳақ тўланмайдиган таътилда бўлдим. Бироқ, афсуски, оилавий муаммоларим ана шу даврда ҳал бўлмади ва энди мен мазкур ташкилотдан бўшамоқчиман. Мен ҳақ тўланмайдиган таътилда бўлган давр учун ишдан бўшатилганда компенсация олиш ҳуқуқига эгаманми?
Г.Саидова.
‑– Меҳнат кодексининг 142-моддасига мувофиқ йиллик асосий таътилни олиш ҳуқуқини берувчи иш стажига ходим ҳақиқатда ишламаган бўлса ҳам, лекин унинг иш жойи (лавозими) сақланган вақт ҳам киради, болани парваришлаш учун қисман ҳақ тўланадиган таътил ва иш ҳақи сақланмаган ҳолда бериладиган муддати икки ҳафтадан кўп бўлган таътиллар бундан мустасно.
Компенсация ҳақида гапирганда пуллик компенсация фойдаланилмаган таътиллар учун белгиланганлигини эслатиш жоиз (МКнинг 151-моддаси). Ушбу компенсация ходимга фойдаланилмаган барча йиллик асосий ва қўшимча таътиллар учун тўланади. Бироқ ҳақ тўланмайдиган таътил учун пуллик компенсация тўланмайди.
Алексей НИЯЗМЕТОВ,
юрист.