Хорижий компания билан товарларни етказиб беришга контракт тузилди. Товарни маҳаллий корхона сотувчисининг омборидан ушбу компаниянинг Ўзбекистонда жойлашган ваколатхонаси олиб чиқиб кетади. Контрактда етказиб берилган товар ҳақи сўмда тўланиши назарда тутилган.
Ҳисобварақ-фактурада норезидент харидорнинг қандай реквизитлари кўрсатилиши керак?
Р.Сапаров.
– Бундай турдаги контрактни сўмда тўлаш шарти билан тузиш қонунийдир. Бунда контракт импорт контракти ҳисобланмайди.
Товарларнинг Ўзбекистон божхона ҳудудидан уларни қайта олиб кириш тўғрисидаги мажбуриятни олмасдан олиб чиқиб кетилиши, агар қонун ҳужжатларида бошқача қоида белгиланмаган бўлса, товарлар экспортидир («Ташқи иқтисодий фаолият тўғрисида»ги Қонуннинг 11-моддаси). Контракт экспорт контракти деб ҳисобланиши учун товар ЎзР божхона ҳудудидан олиб чиқилиши керак. Бундай контрактлар учун тўловнинг хорижий валютада белгиланиши мажбурий шарт ҳисобланади (Низомнинг 3.6-банди, ВМнинг 30.09.2003 йилдаги 416-сон қарорига 1-илова).
Норезидент билан контракт тузилаётганлиги, бироқ шартларга кўра товар божхона ҳудудини кесиб ўтмай, норезидентнинг ваколатхонаси томонидан сотувчининг омборидан олиб чиқиб кетилаётганлиги сабабли товар баҳоси ва тўловнинг миллий валютада белгиланиши қонунийдир.
Ҳисобварақ-фактурани расмилаштиришга доир талаблар Солиқ кодексининг 222-моддаси ҳамда Ҳисобварақ-фактураларни ҳисобга олиш ва расмийлаштириш тартиби (3-илова, АВ томонидан 22.03.2013 йилда 2439-сон билан рўйхатдан ўтказилган) билан белгиланган. Харидорнинг реквизитларида норезидентга (хорижий компанияга) доир маълумотлар: номи, жойлашган жойи (почта манзили) ва товарлар харидори – солиқ тўловчининг идентификация рақами кўрсатилади.
Товар ишончнома бўйича олинганлиги тўғрисидаги белгиларни норезидент ваколатхонаси контракт шартларига кўра қайд этади.
Замира ЖЎРАЕВА, «Norma» МЧЖ эксперти.
