Яқин-яқингача бирор байрам ёки тантаналар яқинлашган сайин кишининг юраги така-пука бўла бошларди: ишқилиб бу сафар пақилдоқлар камроқ пақилласин-да, дердик.
Ҳукуматнинг «Ўзбекистон Республикаси ҳудудида пиротехника воситалари айланишини тартибга солиш чора-тадбирлари тўғрисида»ги қарори (10.12.2009 йилдаги 309-сон қарори), кейин эса республикамизнинг «Пиротехника буюмлари муомаласи тартибга солиниши муносабати билан Ўзбекистон Республикасининг айрим қонун ҳужжатларига қўшимчалар киритиш тўғрисида»ги Қонуни (22.09.2010 йилдаги ЎРҚ-261-сон) қабул қилиниши билан қулоқларимиз анча тинчигандек бўлди – пиротехника буюмларини қонунга хилоф равишда ишлаб чиқарган, тайёрлаган, сақлаган, ташиган, жўнатган, улардан фойдаланган, худди шунингдек, уларни қонунга хилоф равишда мамлакатга олиб кирганлик учун жазо чоралари кескин кучайтирилди.
Лекин «тадбиркорлик таваккалчилиги»ни қўрқмасдан зиммасига олаётган «чапдаст»лар ҳали ҳам учраб турар экан. Бу борадаги ҳуқуқбузарликларни аниқлашда божхоначиларнинг хизмати салмоқли бўлаётир. Хусусан, жорий йилнинг ўтган даври мобайнида улар томонидан 33 та ҳолатда 23 минг донага яқин пиротехника воситаларининг ноқонуний айланмасига чек қўйилди. Мисол учун, Самарқанд вилояти божхона бошқармаси ходимлари Самарқанд шаҳри Рудакий кўчасида ўтказган тадбир давомида фуқаро М.Л.нинг 1 минг дона «Трения» номли ҳамда 36 дона «Соловей разбойник» номли пиротехника воситаларини ноқонуний равишда 720 000 сўмга пуллаётган вақтда қўлга олишди.
● Тошкент вилояти божхоначилари бошқа ҳуқуқни муҳофаза қилиш идоралари билан ҳамкорликда кинолог ходим ва «Портловчи моддаларни қидириш» йўналишида ўргатилган хизмат ити ёрдамида вилоятнинг Бўка тумани Ўзбекистон кўчасида жойлашган фуқаро А.Д.нинг хонадонини холислар иштирокида кўздан кечириб, хонадоннинг ётоқхонасидан 500 донага яқин яшириб қўйилган пақилдоқларни ашёвий далил сифатида олишди.
● Қашқадарё вилояти божхоначилари эса «Москва-Душанбе» йўналишидаги йўловчи поездини божхона назоратидан ўтказишганда, ушбу поездда вагон кузатувчиси сифатида келаётган фуқаро Т.Н.га тегишли буюмлар орасидан яширинча жойлаштирилган 50 дона пиротехника воситаларини аниқлашди.
Мазкур ҳуқуқбузарлик ҳолати бўйича Жиноят ишлари бўйича Нишон туман судининг қарори билан контрабандачи Т.Н.га нисбатан тегишли жазо тайинланиб, ҳуқуқбузарлик ашёси бўлмиш пиротехника воситалари белгиланган тартибда йўқ қилиниши таъминланди.
Яқинлашаётган Янги йил байрами турли пиротехника воситаларисиз ҳам қувноқ ва қизиқарли ўтади. Бунда ҳуқуқ-тартибот идоралари, шу жумладан божхоначиларнинг ҳам муносиб ҳиссаси бор албатта.
ДБҚ Матбуот хизмати.
