«Ҳисобварақ», «Ҳисоб рақам», «Счёт» – қай бири тўғри?» мақоласида келтирилган таъкидлар ўринли, ҳақиқатан ҳам банк фаолияти ва бухгалтерия ҳисобига доир меъёрий ҳужжатларида «ҳисобварақ» термини қўлланилган. Муаллифнинг якуний фикрларига қўшилган ҳолда «ҳисобварақ» ёки «ҳисоб варақ» атамалари ўрнига «счёт» атамасидан фойдаланилса мақсадга мувофиқ бўлар эди.
Бухгалтерия ҳисоби соҳасида кўпчилик атамалар асосан русчадан олинган, шу сабабли ўзбек тилига таржимасини ҳар таржимон ҳар хил таржима қилган бўлиши мумкин. Бунда нимага «ҳисобварақ-фактура» атамаси тўлиқ таржима қилинмаган, деган савол туғилиши мумкин.
Бу каби саволларнинг олдини олиш учун Молия вазирлиги, Марказий банк, Давлат солиқ қўмитаси ҳамда бошқа вазирлик ва идоралар томонидан кейинчалик Адлия вазирлигида тасдиқланганидан сўнг барча хўжалик юритувчи субъектлар учун қўлланилиши мажбурий бўлган меъёрий ҳужжатларни ишлаб чиқишда атамалар бир хиллигига амал қилиниши мақсадга мувофиқ деб ҳисоблаймиз.
Тошкент молия институти
«Бухгалтерия ҳисоби» кафедраси жамоаси.
