Давлат божхона қўмитасида Ўзбекистон Республикаси давлат мустақиллигининг 22 йиллиги байрамига бағишланган тантанали тадбир ўтказилди.
Мустақиллик туфайли вужудга келган Ўзбекистон божхона тизими бугунги кунда мамлакатимиз хавфсизлигини таъминлаш, унинг иқтисодий манфаатларини мустаҳкамлашдаги асосий бўғинлардан биридир. Жумладан, божхона ходимларининг самарали меҳнатлари натижасида жорий йилнинг ўтган 8 ойи давомида Давлат бюджетига ўтган йилнинг шу даврига нисбатан салкам 374 млрд сўм кўп тўловлар ундирилди. Ташқи иқтисодий фаолият иштирокчиларига божхона тўловларидан 5,5 трлн сўмлик божхона имтиёзлари берилди.
Контрабанда ва божхона қонунчилиги бузилиши бўйича 16 мингдан ортиқ ҳуқуқбузарликларнинг олди олиниб, 122 млрд сўмлик товар-моддий бойликлар ушлаб қолинди.
Божхона ходимларининг меҳнати давлатимиз раҳбари, республика Ҳукумати томонидан ҳамиша муносиб тақдирланиб келмоқда. Ўзбекистон Республикаси Президентининг шу йил 23 августдаги Фармони билан Қуролли Кучлар, ҳуқуқни муҳофаза қилиш ва назорат органларининг бир гуруҳ ходимлари, шу жумладан 5 нафар божхоначилар ҳам давлатимизнинг юксак мукофотлари – «Дўстлик» ва «Мардлик» орденлари, «Жасорат», «Содиқ хизматлари учун» ва «Шуҳрат» медалларига сазовор бўлдилар.
ДБҚ Матбуот хизмати.
