Олиб чиқиш учун хулоса талаб қилинади

ЎзР фуқаролари бўлган икки жисмоний шахс муассислари ҳисобланган МЧЖ Қозоғистонда МЧШ (МЧЖ) шаклида ҚК барпо этишда иштирок этиш ниятида. Устав фондига ҳисса сифатида 2009 йилда импорт контракти бўйича Австрияда харид қилинган ва у ердан олиб келинган, қорамол ва парранда гўштини қайта ишлаш ускунасини бериш режалаштириляпти. МЧЖга тегишли бўлган ускунани Ўзбекистон тарафи назорат пакетига эга бўладиган ҚКнинг устав фондига бериш учун олиб чиқиш чоғида бирор-бир чек­лашлар белгиланганми? Хорижда хўжалик юритувчи субъектларни барпо этишда иштирок этиш масаласи қандай меъёрий ҳужжатлар билан тартибга солинади? Давлат органларининг махсус рухсатномалари талаб қилинадими?
Д.Пўлатов.
– Президентнинг «Экспорт-импорт операцияларини тартибга солиш чора-тадбирлари тўғрисида» қарори (11.03.2005 йилдаги ПҚ-26-сон) билан белгиланишича, истеъмолда бўлган машиналар, ускуналар ва механизмлар (ТИФ ТН 84–89 код гуруҳлари бўйича) экспорти 2005 йилнинг 1 мартидан бошлаб Ташқи иқтисодий алоқалар, инвестициялар ва савдо вазирлигининг ваколатли органи – «Ўзбекэкспертиза» ОАЖнинг хулосаси асосида фақат Ҳукумат қарорлари бўйича амалга оширилади.
«Ташқи иқтисодий фаолият тўғрисида»ги Қонуннинг (14.06.1991 йилдаги 285-XII-сон, 26.05.2000 йилдаги 77-II-сон Қонун таҳририда) 11-моддасига мувофиқ товарларнинг Ўзбекистон Республикаси божхона ҳудудидан уларни қайта олиб кириш тўғрисидаги мажбуриятни олмасдан олиб чиқиб кетилиши, агар қонун ҳужжатларида бошқача қоида белгиланмаган бўлса, товарлар экспортидир. Шу муносабат билан, шунингдек мазкур ускуна қўшма корхона манзилига устав фондига ҳисса сифатида олиб чиқилаётганлиги ва товарни қайтариш мажбуриятидан озод қилиниши мумкинлигини ҳисобга олиб, ушбу ускунани «Ўзбекэкспертиза» ОАЖнинг Ўзбекистон Республикаси Ҳукумати қарори билан тасдиқланган тегишли хулосаси тақдим этилгандагина божхонада расмийлаштириш мумкин бўлади.
Шунингдек маълум қиламизки, Ўзбекистонда рўйхатдан ўтказилган юридик шахс хорижда ташкилотни у барпо этиладиган мамлакат ва Ўзбекистон қонун ҳужжатларига мувофиқ Ўзбекистон Республикаси юридик шахслари томонидан чет элда ташкилотлар ташкил этиш ёки уларнинг устав фонди (капитали)да улуш билан иштирок этиш тўғрисида хабардор этиш тартиби ҳақидаги низомда (ТИАИСВ, ИВ, ТИВ, ДСҚ ва ДБҚнинг АВ томонидан 17.05.2013 йилда 2457-сон билан рўйхатдан ўтказилган қарори билан тасдиқланган) назарда тутилган тартибда барпо этишга ҳақлидир.
ДБҚнинг Божхона тарифларини тартибга солиш ва тўловлар ҳисобини юритиш бош бошқармаси кўмагида тайёрланди.