Мамлакатимиз хусусий секторини янада қўллаб-қувватлаш мақсадида Президентимиз Ислом Каримов томонидан 2012 йил 20 декабрда тасдиқланган «Тадбиркорлик фаолияти соҳасидаги рухсат бериш тартиб-таомиллари тўғрисида»ги Қонун қабул қилинди.
У 2013 йилнинг июнь ойида кучга киради.
Мамлакатимизда демократик ислоҳотларни янада чуқурлаштириш ва фуқаролик жамиятини ривожлантириш концепциясида ушбу қонун ҳужжатининг муҳимлиги қайд этилган. Бу бошқарув тизимини такомиллаштириш, ортиқча бюрократик тўсиқларни бартараф этиш вазифалари билан боғлиқдир. Шу мақсадда тадбиркорлик фаолиятини юритиш учун рухсат бериш тартиб-таомилларининг қатъий чекланган рўйхати ва турларини белгилаш зарурлиги таъкидланган.
Рухсат бериш тизимининг асосий принцип ва қоидаларини мустаҳкамлашга қаратилган «Тадбиркорлик фаолияти соҳасидаги рухсат бериш тартиб-таомиллари тўғрисида»ги Қонунда тадбиркорлик субъектларининг ҳуқуқлари ва қонуний манфаатлари, рақобатни чеклайдиган рухсат бериш тартиб-таомиллари белгиланишига йўл қўйилмаслик рухсат бериш тартиб-таомилларининг асосий принциплари сифатида мустаҳкамланган. Шу билан бирга, ҳужжатда рухсат бериш тартиб-таомилларининг ошкоралиги, очиқлиги ва тушунарлилиги, рухсат этиш хусусиятига эга ҳужжатларни бериш тартибига доир талабларнинг ягоналиги ва уларнинг «бир дарча» орқали берилиши кўзда тутилган.
Рухсат этиш хусусиятига эга ҳужжатнинг амал қилиш муддати, одатда, чекланмайди. Ҳаракатни бажариш ёки муайян фаолиятни амалга ошириш хусусияти ва шартлари талаб қилинадиган айрим ҳужжатлар бундан мустаснодир. Рухсат этиш хусусиятига эга ҳужжатни бериш тўғрисидаги аризани кўриб чиқиш, уни бериш ёки беришни рад этиш муддатлари ариза барча зарур ҳужжатлар билан қабул қилиб олинган санадан эътиборан ўттиз иш кунидан ошмаслиги керак.
Агар ваколатли орган белгиланган муддат мобайнида тадбиркорлик субъектига рухсат этиш хусусиятига эга ҳужжатни бермаса ёки уни беришни рад этмаса, тадбиркорлик субъекти 30 кунлик муддат ўтганидан кейин амалга ошириш учун ҳужжат тақдим этган фаолиятни бошлаш ҳуқуқига эга ва бу ҳақда ваколатли органни ёзма равишда хабардор қилади (ҳукумат томонидан тасдиқланган айрим ҳоллар бундан мустасно). Бундай ҳолда ваколатли орган тадбиркорлик субъектининг хабарномаси олингандан кейин беш иш куни ичида унга рухсат этиш хусусиятига эга ҳужжатни бериши шарт.
Қонунда рухсат этиш хусусиятига эга ҳужжатни беришни рад этиш учун асослар ва ҳужжатнинг амал қилиши тўхталиши ёки бекор қилиниши мумкин бўлган ҳолатлар ҳам қайд этилган. «Тадбиркорлик фаолияти соҳасидаги рухсат бериш тартиб-таомиллари тўғрисида»ги Қонуннинг амал қилиши тадбиркорлик субъектларини давлат рўйхатидан ўтказиш ҳамда ҳисобга қўйиш, фаолиятнинг айрим турларини лицензиялаш, аккредитация қилиш, сертификатлаштириш, стандартлаштириш, метрология ва техник жиҳатдан тартибга солиш, давлат экологик экспертизаси, давлат сирларини сақлаш соҳаларига нисбатан татбиқ этилмайди.
ЎзА материали асосида тайёрланди.
