Norma.uz
Газета Норма маслахатчи / 2019 год / № 08 / Қонунчиликдаги янгиликлар

Янги ҳужжатларни тақдим этамиз

 

Тақдим этилаётган, шунингдек сўнгги пайтда қабул қилинган бошқа ҳужжатларнинг тўлиқ матни билан «Norma» АҚТ ва nrm.uz сайтида танишиб чиқишингиз мумкин.

 

1 апрелдан яна 6 та рухсат бериш тартиб-таомили бекор қилинади

 

Президентнинг «Давлат хизматлари кўрсатиш миллий тизимини янада комплекс ривожлантириш чора-тадбирлари тўғрисида»ги қарори қабул қилинди. Адлия вазирлигининг Telegram-каналида шу ҳақда хабар берилди.

 

Биринчидан, 2019 йил 1 апрелдан тадбиркорлик фаолияти соҳасидаги қуйидаги рухсат бериш тартиб-таомиллари бекор қилинади:

♦ экспорт контракти рўйхатдан ўтказилганлиги тўғрисида гувоҳнома;

♦ мол сўйишни амалга ошириш ҳуқуқини берувчи рухсат гувоҳномаси;

♦ ер қаъри участкасидан фойдаланишда бузилган ерлар қайта тикланганлиги ҳақида хулоса;

♦ вояга етмаганларга мўлжалланган дори воситаларини реклама қилишга рухсатнома;

♦ қимматбаҳо металлар ва қимматбаҳо тошлардан ясалган буюмлар билан чакана савдо қиладиган тадбиркорлик субъектларининг савдо объектлари жойлашуви;

♦ ерларнинг барча тоифаларида геологик-суратга олиш, қидириш, геодезия ва бошқа турдаги қидирув ишларини олиб боришга рухсатнома.

 

Эслатиб ўтамиз, 2018 йил 1 июнда бизнесдаги рухсат бериш тартиб-таомилларининг айрим турлари, шу жумладан, уларнинг баъзи турларини бирлаштириш йўли билан бекор қилинган эди (11.04.2018 йилдаги ПФ–5409-сон Фармонга 1 ва 2-иловалар, шунингдек амалдаги Тадбиркорлик фаолияти соҳасидаги рухсат этиш хусусиятига эга ҳужжатлар рўйхати; ВМнинг 29.10.2018 йилдаги 884-сон қарори).

 

Иккинчидан, 2019 йил 1 июндан:

♦ давлат хизматларидан фойдаланиш учун жисмоний ва юридик шахслар исталган жойдаги Давлат хизматлари марказларига (прописка ва почта манзилидан қатъи назар) мурожаат қилишга ҳақли;

♦ давлат хизматларини олиш учун ЯИДХП орқали мурожаат этганда давлат божи, йиғимлар ва бошқа тўловлар Марказлар орқали ёки бевосита хизмат кўрсатувчи органларга мурожаат этганда тўланадиган сумманинг 90%и миқдорида тўланади.

Учинчидан, 2019 йил 1 августдан бошлаб давлат хизматлари кўрсатишда солиқ қарзи мавжуд ёки мавжуд эмаслиги тўғрисида маълумотномалар, солиқ тўловчининг ҳисобга қўйилганлиги тўғрисида гувоҳномалар, тўланган даромадлар ва жисмоний шахслардан олинадиган даромад солиғининг ушлаб қолинган суммалари тўғрисида маълумотномалар талаб қилиш тақиқланади.

 

 

Электр ҳисоблагичларни маҳаллий ишлаб чиқарувчиларга – имтиёзлар

 

Президентнинг 13.02.2019 йилдаги ПҚ-4189-сон қарори билан давлат раҳбарининг 13.11.2017 йилдаги ПҚ–3384-сон ва 23.10.2018 йилдаги ПҚ–3981-сон қарорларига тегишли тузатишлар киритилди.

 

Ўзгартиришлар иккита асосий жиҳатга дахлдор.

Биринчидан, энди имтиёзлар якка тартибдаги тусга эга бўлмайди. Даставвал улар «Ўзбекэнерго» АЖ, «Ўзтрансгаз» АЖ ва «Tosheleсtroapparat» МЧЖ ХКга татбиқ этилар эди. Энди бу имтиёзлардан электр энергиясини ҳисоблаш қурилмаларини маҳаллий ишлаб чиқарувчиларнинг барчаси фойдалана олади.

Иккинчидан, имтиёзларни қўллаш тартибига ва уларнинг таъсири остига тушадиган объектлар рўйхатига тузатиш киритилди:

♦ энди ҳисоблаш қурилмаларининг ўзи эмас, фақат электр энергияси ҳисоблагичлари ва қўшимча асбоб-ускуналарни ишлаб чиқариш учун фойдаланиладиган бутловчи қисмлар, хом ашё ва материаллар божхона тўловларидан озод этилади (божхона расмийлаштируви учун йиғимлар бундан мустасно). Бунда шарт қўйилди – имтиёз 23.10.2018 йилдаги ПҚ–3981-сон қарор доирасида «Ўзбекэнерго» АЖ билан тузилган шартномалар бўйича етказиб бериладиган позицияларга нисбатан амал қилади;

♦ электр энергиясини ҳисоблаш қурилмаларини маҳаллий ишлаб чиқарувчилар юқорида кўрсатилган ҳисоблагичлар ва асбоб-ускуналарни сотиш чоғида ҚҚСдан озод этилади.

Имтиёзларнинг амал қилиш муддати ўзгармади – 2022 йил 1 январгача.

 

Ҳужжат Қонун ҳужжатлари маълумотлари миллий базасида (lex.uz) эълон қилинган ва 14.02.2019 йилдан кучга кирди.

 

Олег Заманов,

«Norma» МЧЖ эксперти.

 

 

 

2019 йилда қайси қонун лойиҳалари кўриб чиқилади

 

Вазирлар Маҳкамасининг 11.02.2019 йилдаги 113-сон қарори билан 2019 йилда қонун лойиҳаларини ишлаб чиқиш ва Ўзбекистон Республикаси Олий Мажлисининг Қонунчилик палатасига киритиш дастури тасдиқланди.

 

Ҳужжат Давлат дастури–2019, Маъмурий ислоҳотлар концепцияси ва Норма ижодкорлиги фаолиятини такомиллаштириш концепцияси, шунингдек бошқа ҳужжатларда назарда тутилган қонун лойиҳаларининг ўз вақтида ва сифатли ишлаб чиқилишини таъминлаш мақсадида қабул қилинди.

Дастурга жами 38 та қонун лойиҳаси киритилган. Уларни ишлаб чиқиш бўйича масъул ижрочилар, Вазирлар Маҳкамаси ва Қонунчилик палатасига киритиш муддатлари, шунингдек улар қабул қилинган тақдирда кутиладиган натижалар кўрсатилган. Улар орасида, хусусан, қуйидагилар бор:

янги таҳрирдаги Солиқ кодекси. 1 июлгача Қонунчилик палатасига киритилиши кутилмоқда. Ҳужжат илғор хорижий тажрибадан келиб чиққан ҳолда халқаро молия ташкилотлари мутахассислари билан биргаликда ишлаб чиқилади. Шу жумладан ҳалол солиқ тўловчиларни рағбатлантириш ва яширин фаолият юритадиган субъектларни жазолаш механизмлари назарда тутилади;

янги таҳрирдаги Меҳнат кодекси. Ҳужжат IV чорак охирида Вазирлар Маҳкамасига тақдим этилади. Ишнинг ўзига хос хусусиятига кўра меҳнат шартномасини тузиш ва бекор қилиш тартибининг соддалаштирилиши, ходим билан бир вақтда иш берувчининг ҳам манфаатларини ифодалайдиган қоидалар киритилиши кутилмоқда;

Жиноят-процессуал ва Фуқаролик кодексларига ўзгартиришлар. Улар қонунга хилоф тарзда ҳукм этиш, жиноий жавобгарликка тортиш, эҳтиёт чораси сифатида қамоққа олиш ва муносиб хулқ-атворда бўлиш ҳақида тилхат олиш, қамоқ тариқасидаги маъмурий жазони бериш натижасида фуқарога етказилган зарарни ундириб олиш масалаларига тааллуқли бўлади. Зарарни тегишли давлат идораларининг бюджетдан ташқари жамғармалари ҳисобидан қоплаб, кейинчалик ушбу суммани айбдор шахсдан ундириб олиш режалаштирилмоқда;

янги таҳрирдаги «Валютани тартибга солиш тўғрисида»ги Қонун. Парламентга тахминан 1 апрелда киритилади. Ҳужжатда қуйидагиларни назарда тутиш режалаштирилмоқда:

а) соҳага оид қонуности ҳужжатларни инвентаризациядан ўтказиш, ҳаволаки нормаларни максимал даражада қисқартирган ҳолда валюта операцияларини амалга оширишга оид барча жиҳатларни тартибга солиш;

б) халқаро тажрибани чуқур ўрганиш асосида ва тадбиркорлар эҳтиёжларини инобатга олган ҳолда валюта операцияларини тартибга солишни соддалаштириш;

в) жисмоний ва юридик шахсларнинг ўз валюта маблағидан эркин фойдаланиш ҳуқуқининг кафолатини мустаҳкамлаш;

г) капитал ҳаракати билан боғлиқ операцияларни тартибга солиш;

д) валюта бозори фаолиятини янада такомиллаштириш ва эркинлаштириш;

е) норезидентларнинг республикамизда фаолият юритиши натижасида олинган маблағларини чет эл валютасига айирбошлаш амалиётини янада соддалаштириш ва бошқалар;

янги таҳрирдаги «Рақобат тўғрисида»ги Қонун табиий монополиялар соҳасида тартибга солишни кучайтириш имконини беради. Қонун бузилиш ҳолати учун монополистларнинг жавобгарлиги оширилади, АКТ соҳасида рақобат тартибга солинади. Лойиҳа 1 ноябргача киритилади;

«Қимматли қоғозлар бозори тўғрисида»ги Қонунга тузатишлар. Ваколатли давлат органининг ваколатлари кенгайтирилади, шу жумладан банк сирларини очиш ҳуқуқи билан. Қимматли қоғозлар бозорини тартибга солувчи органлар ўртасида ахборот алмашиш вақтида олинган махфий ахборотни ошкор қилиш бўйича чекловлар белгиланади;

«Аудиторлик фаолияти тўғрисида»ги Қонунга ўзгартиш ва қўшимчалар (1 июлгача ишлаб чиқилади). Улар қуйидагиларга оид бўлади:

а) аудиторлик фаолиятини лицензиялаш жараёнини соддалаштириш;

б) аудиторларни сертификатлаш ва малакасини ошириш тизимини такомиллаштириш;

в) ҳар йили аудиторлик текширувидан ўтиши шарт бўлган ижтимоий аҳамиятга эга корхоналарни аниқлаш;

«Мажбурий тиббий суғурта тўғрисида»ги Қонун лойиҳаси (1 августгача Парламентга киритилади). Унда қуйидаги масалалар ўз аксини топади:

а) 2021 йилдан бошлаб мажбурий тиббий суғурта тизимини босқичма-босқич жорий этиш;

б) тегишли норматив-ҳуқуқий базани шакллантириш;

в) соғлиқни сақлаш эҳтиёжи учун ажратилаётган пул маблағларини жамлаш ва тақсимлаш механизмларини такомиллаштириш;

г) «ҳар бир тўлиқ даволанган ҳолат» ҳисобидан келиб чиқиб молиялаштириш механизмларини жорий қилиш;

д) тиббий суғурта дастурларини амалга оширишга нодавлат тиббиёт ташкилотларини кенг жалб этиш ва ҳ.к.;

янги таҳрирдаги «Вазирлар Маҳкамаси тўғрисида»ги Қонун. Тахминан 25 апрелда Қонунчилик палатасига киритиш режалаштирилмоқда. Ҳукумат аъзоларининг ваколатлари ва жавобгарлигини белгилаш, Парламент, Президент, унинг администрацияси, судлар, ҳуқуқни муҳофаза қилиш ва ҳарбийлаштирилган тузилмалар, ННТ, сиёсий партиялар билан ўзаро ҳамкорлиги масалалари тартибга солинади;

янги таҳрирдаги «Норматив-ҳуқуқий ҳужжатлар тўғрисида»ги Қонун. Олий Мажлис палатасига киритилиши мўлжалланган сана – 1 апрель. Тўғридан-тўғри амалга ошириш механизмига эга бўлмаган қонун лойиҳаларини (яъни декларатив, «ҳадли» тусга эга, ҳақиқатда амалга ошириш механизмларини назарда тутмайдиган, – изоҳ таҳр.) киритиш тақиқланишини тартибга солиш кўзланмоқда.

 

Ҳужжат Қонун ҳужжатлари маълумотлари миллий базасида (lex.uz) эълон қилинган ва 12.02.2019 йилдан кучга кирди.

 

Ленара Хикматова,

«Norma» МЧЖ эксперти.

 

Прочитано: 1174 раз(а)

В этой теме действует премодерация комментариев.
Вы можете оставить свой комментарий.

info!Оставляя свой комментарий на сайте, Вы соглашаетесь с нашими Правилами их размещения.
Гость_
Антибот:

Если Вы заметили ошибку, выделите фрагмент текста, содержащий ошибку, и нажмите Ctrl+Enter.
Сайт разработан в ООО «NORMA», зарегистрирован в Узбекском агентстве по печати и информации 01.06.2018г.
Регистрационное свидетельство № 0406.
Адрес: Узбекистан, 100105, г. Ташкент, Мирабадский р-н, ул. Таллимаржон, 1/1.
Тел. (998 78) 150-11-72. Call-центр:1172. E-mail: admin@norma.uz
Копирование материалов сайта без согласования с администрацией ресурса запрещено.
© ООО «NORMA», 2007-2024 г. Все права защищены.
18+   Яндекс.Метрика