Ташкилот божхона расмийлаштируви бўйича мутахассис малака аттестатларига эга бўлган ходимларни ишга қабул қилмоқчи.
Ушбу мутахассислар божхона брокери сифатида фаолиятни амалга ошириш учун рухсатномасиз ташкилотнинг юкларини декларациялашлари мумкинми?
А.Рузмаматов, молиявий маслаҳатчи.
– Ҳа, ташкилот шартнома асосида учинчи шахсларга божхона расмийлаштируви бўйича хизматлар кўрсатиш ниятида бўлмаса, ўз юкларини рухсатномасиз декларациялаши мумкин.
Божхона брокери фаолиятининг моҳияти божхона операцияларини декларантнинг ёки ваколатли шахснинг топшириғига кўра ва унинг номидан божхона тўғрисидаги қонун ҳужжатларига мувофиқ амалга оширишдан иборат.
Божхона брокерининг декларант ёки ваколатли шахс билан ўзаро муносабатлари шартнома асосида йўлга қўйилади.
Божхона брокери ўз фаолиятини божхона органининг рухсатномаси асосида амалга оширади.
Божхона брокери сифатида фаолиятни амалга ошириш учун рухсат этувчи талаблар ва шартлар ўз штатида божхона расмийлаштируви бўйича мутахассисга эга бўлган ҳамда учинчи шахсларга божхона расмийлаштируви бўйича хизматлар кўрсатмайдиган ЎзР юридик шахсларига нисбатан қўлланилмайди.
Бундай хизматларни кўрсатмайдиган юридик шахс ДБҚга штатида божхона расмийлаштируви бўйича мутахассислар мавжудлиги тўғрисида хабарнома беради. Унга штатга божхона расмийлаштируви бўйича мутахассис ишга қабул қилинганлиги тўғрисидаги ва унинг аввалги иш жойида меҳнат шартномаси бекор қилинганлиги ҳақидаги буйруқнинг (ёки буйруқдан кўчирманинг) кўчирма нусхаси илова қилинади (БКнинг 277-моддаси).
Александр Лобанов, «Norma» МЧЖ эксперти.
