Мен истиқомат қилаётган маҳалла ёнида ер бор – ярми ботқоқлик, ярмида эса маҳаллий аҳоли шунчаки ўз чорвасини боқади. Бир вақтлар бу ерлар кўм-кўк боғ бўлган. Бир танишимдан эшитиб қолдим: кўкаламзорлаштириш учун узоқ муддатга ер участкасини олса бўларкан. Мевали боғ яратиш ниятим бор.
Ушбу таклиф билан кимга мурожаат қилсам бўлади ва бундай мурожаатим қанчалик асосли?
А.Мусаев.
– Бундай таклиф билан маҳаллий давлат ҳокимияти органига мурожаат қилишингиз мумкин.
Агар сиз айтаётган ер участкаси минтақадаги аҳоли пунктида жойлашган бўлса, тегишли ариза билан туман ҳокимига, Тошкент шаҳрида жойлашган бўлса – пойтахт ҳокимига мурожаат қиласиз (Ер кодексининг 5–6-моддалари). Чунки ер муносабатлари билан боғлиқ масаланинг кўриб чиқилиши маҳаллий давлат ҳокимияти органларининг ваколатига киради (Ер кодекси 23-моддасининг 1-қисми); бу хусусдаги уларнинг қарорлари халқ депутатлари тегишли Кенгаши томонидан тасдиқланади («Маҳаллий давлат ҳокимияти тўғрисида»ги Қонун 10-моддасининг 1-қисми).
Шуни назарда тутиш керакки, Тошкент шаҳри ва Тошкент вилоятида ер участкалари шу шаҳар (вилоят) ҳокимияти томонидан фақатгина тегишли Ҳукумат комиссиясининг қарорига асосан берилади (ВМнинг 22.08.2008 йилдаги 189-сон, 31.12.2008 йилдаги 292-сон, 20.01.2009 йилдаги 16-сон ва 18.02.2009 йилдаги 45-сон қарорлари).
Мурожаатингизнинг қанчалик асослилигини айнан юқоридаги давлат органлари аниқлайди.
Камoл Музаффаров,
«Norma Online» етакчи эксперти.
