Буйруқ нусхаси фақат ходим учун

Янги иш берувчи ишга тушаётган шахсдан аввалги иш жойидан меҳнат шартномасини бекор қилиш тўғрисидаги буйруқни келтиришни талаб қилиш ҳуқуқига эгами?

Х.К.

Ангрен шаҳри,

Тошкент вилояти.

– Меҳнат кодексининг 80-моддасига кўра ишга қабул қилиш вақтида ишга кираётган шахс қуйидаги ҳужжатларни:

паспорт ёки унинг ўрнини бо­садиган бошқа ҳужжатни, 16 ёш­гача бўлган шахслар эса – ту­ғилганлик тўғрисидаги гу­воҳнома ва турар жойидан маълумотнома ҳамда меҳнат фаолияти билан шуғулланишига ўсмирнинг ота-онаси ёки улар ўрнини босувчи шахсларнинг розилигини;

меҳнат дафтарчасини, биринчи маротаба ишга кираётган шахслар бундан мустасно. Ўриндошлик асосида ишга кираётган шахслар меҳнат дафтарчаси ўрнига асосий иш жойидан олган маълумотномани;

ҳарбий хизматга мажбурлар ёки чақирилувчилар тегишинча ҳарбий билетни ёки ҳарбий ҳисобда турганлик ҳақидаги гу­воҳномани;

қонун ҳужжатларига мувофиқ махсус маълумотга ёки махсус тайёргарликка эга шахсларгина бажариши мумкин бўлган ишларга кираётганда олий ёки ўрта махсус, касб-ҳунар ўқув юртини та­момлаганлиги тўғрисидаги дип­ломни ёхуд мазкур ишни ба­жариш ҳуқуқини берадиган гу­воҳномани ёки бошқа тегишли ҳуж­жатни тақдим этади.

Ишга қабул қилиш чоғида иш берувчи ходимнинг СТИР (солиқ тўловчининг идентификация ра­қами)ни ва ШЖБПҲ (шахсий жам­ғариб бориладиган пенсия ҳисобварағи) тўғрисидаги маълумотларни ҳам талаб этиши мумкин, бу ходимнинг манфаатларини кўзлаб қилинади.

Ишга қабул қилиш вақтида иш­га кираётган шахсдан қонун ҳуж­жатларида кўрсатилмаган ҳуж­жатларни талаб қилиш та­қиқ­ланади. Ишга кираётган шахс­дан аввалги иш жойидан у билан меҳнат шартномаси бекор қилиниши тўғрисидаги буйруқ нусхасини талаб қилишга иш берувчи ҳақли эмас.

Ленара ХИКМАТОВА, юрист.