Пенсияга чиқиши муносабати билан ходим ўз хоҳишига кўра ишдан бўшамоқчи, лекин унинг аризасини имзолашмаяпти.
Ходим ишдан бўшаш учун аризани уни маъқуллашларини кутмасдан қолдириб, ишга чиқмаслиги мумкинми?
– Ходим пенсияга чиқиши муносабати билан меҳнат шартномасини бекор қилиш истагини маълум қилган бўлса, мулкчилик шаклидан қатъи назар, иш берувчи ходим билан тузилган меҳнат шартномасини у сўраган муддатда бекор қилиши шарт (МК 99-м. 5-қ.). Мазкур ҳолатда ариза берилгандан кейин 2 ҳафта ишлаб берилиши талаб этилмайди.
Иш берувчининг ходимнинг аризасини имзолашни ва у билан тузилган меҳнат шартномасини бекор қилишни хоҳламаслиги аҳамиятга эга бўлмайди. Ходим аризада кўрсатилган санадан кейин ишни тўхтатишга ҳақлидир.
Иш берувчи билан келишмовчиликлар юзага келмаслиги учун ходим келиб тушган ҳужжатларни рўйхатдан ўтказиш билан шуғулланувчи хизматда (бу котибият, кадрлар бўлими ёки бошқа хизматлар бўлиши мумкин) аризани рўйхатдан ўтказиши, аризани қабул қилиб олган ходимдан имзоси билан буни тасдиқлашини ва рўйхатдан ўтказиш журналига киритилган рақамини қайд этишини сўраши лозим.
Бундан кейин ходим иш берувчидан у билан тузилган меҳнат шартномасини бекор қилиш расмийлаштирилишини, тўлиқ ҳисоб-китоб қилинишини ва меҳнат дафтарчаси берилишини талаб қилишга ҳақлидир. Иш берувчи рад жавобини берганда ходим Давлат меҳнат инспекциясига мурожаат қилишга ҳақли бўлади.