Президентнинг 24.05.2017 йилдаги ПФ-5052-сон ва 5.07.2017 йилдаги ПФ-5106-сон фармонларига мувофиқ корхона битирувчиларни таълим муассасасини тамомлагандан кейин 3 йил ичида ишга олганда, Солиқ кодексида назарда тутилмаган ЖШДС ва ЯИТ бўйича имтиёзларни қўллашга ҳақли бўладими?
– Солиқ имтиёзларининг ҳаммаси ҳам Солиқ кодексига асосан тақдим этилмайди.
2018 йилнинг 1 январидан бошлаб касб-ҳунар коллежлари, академик лицейлар ва олий таълим муассасаларининг битирувчилари ишлайдиган корхоналар ставкани қуйидагича камайтириш тарзидаги ЯИТ бўйича имтиёзни қўллаши мумкин (24.05.2017 йилдаги ПФ-5052-сон Фармоннинг 6-банди):
● иш фаолиятининг биринчи йилида – битирувчининг МҲТФдан 50%га;
● иккинчи ва учинчи йилларда – битирувчининг МҲТФдан 25%га.
Ушбу имтиёз қуйидагиларга татбиқ этилмайди:
● бюджет ташкилотлари;
● табиий монополия субъектлари;
● УФда давлат улуши 50%дан ортиқ бўлган ташкилотлар.
Президентнинг 5.07.2017 йилдаги ПФ-5106-сон Фармони билан таълим муассасасини тамомлаганига 3 йил бўлмаган, биринчи марта ишга қабул қилинган ёшларга даромад солиғини биринчи йил учун 50%, иккинчи ва учинчи йиллар учун эса 25%га камайтириш кўринишидаги ЖШДС бўйича имтиёз назарда тутилган эди (ПФ-5106-сон Фармоннинг 13-банди 9-хатбошиси).
2019 йил 1 январдан имтиёз ўз кучини йўқотди (26.12.2018 йилдаги ПФ-5607-сон Фармонга 1-илова 4-банди).
Жавобни «Norma» МЧЖ экспертлари тайёрладилар.
