Математика – жиддий фан. Божхона хизмати ходимининг машаққатли касбида бу жиддий фанни четлаб ўтиб бўлмайди албатта. Бугун Давлат божхона қўмитаси Божхона институтида мазкур жиддий фандан божхона хизмати подполковниги Баётбек Отаниёзов дарс беради.
Ўз касбининг устаси бўлган Б.Отаниёзов божхона органларидаги хизмат фaолиятини 2006 йилда бошлаган. 2018 йилнинг декабрь ойидан ҳозирги кунга қадар институтнинг Математика ва гуманитар фанлар кафедраси бошлиғи лавозимида хизмат қилиб келмоқда.
Институт ўқув жараёнини такомиллаштириш, кафедра профессор-ўқитувчиларига ўқув-услубий материалларни тайёрлашда қаҳрамонимизнинг хизматлари катта. У педагогик фаолияти давомида кафедрада ўқитилаётган иқтисодчилар учун математика, эҳтимоллар назарияси ва математик статистика, иқтисодий жараёнларни математик моделлаштириш фанларидан узлуксиз равишда маъруза ва амалий машғулот дарсларини олиб боради.
Бундан ташқари ўзи ўқитаётган фанлар доирасида 10 та ўқув-услубий қўлланма ва ўндан ортиқ илмий мақолалар чоп эттирган. Ҳозирги кунда у «Иқтисодий жараёнларни математик моделлаштириш асосида таълим самарадорлигини ошириш» мавзусида илмий-тадқиқот ишларини давом эттириб келмоқда.
– Ҳаётдаги ҳар қандай муваффақиятнинг асоси илмдир. Шу маънода бугунги кунда мамлакатимиз иқтисодий хавфсизлигини таъминлаш ишига жавобгар бўлган божхона хизмати ходимлари ҳам ҳар жиҳатдан билимли, виждонли ва маънавий баркамол бўлишлари кераклигини даврнинг ўзи тақозо этмоқда, – дейди Баётбек Отаниёзов.
Азизбек САИДҚУЛОВ, божхона ходими.
