ЯСТ тўловчи корхона 2018 йил октябрда ташкилот мулкида бўлган асосий воситаларни реализация қилди. Улар 2016 йил 1 январдаги ҳолатга кўра қайта баҳоланган.
Кичик корхоналар асосий воситаларни 3 йилда 1 марта мажбурий равишда қайта баҳоласалар, сотиш чоғида уларни қайта баҳолаш керакми?
– Асосий воситаларни 2018 йил октябрда реализация қилиш пайтида қўшимча баҳолаш керак эмас.
Асосий воситаларни қайта баҳолаш – уларнинг тикланиш қийматини бозор нархлари замонавий даражасига мувофиқлаштириш мақсадида уларга вақти-вақти билан аниқлик киритиш.
Асосий фондларни қайта баҳолаш даврийлиги 1 январь ҳолати бўйича асосий фондларни қайта баҳолашни ўтказиш тартиби тўғрисида низомда (АВ томонидан 4.12.2002 йилда 1192-сон билан рўйхатдан ўтказилган) белгиланган:
● йирик корхоналар учун – ҳар йили, мулкчилик шакли ва идоравий бўйсунувидан қатъи назар, барча хўжалик юритувчи субъектлар қайта баҳолашни ўтказишлари шарт;
● микрофирма ва кичик корхоналар учун – 3 йилда 1 марта (2014 йил 1 январдан бошлаб, 25.12.2013 йилдаги ПҚ-2099-сон қарорнинг 6-банди).
Асосий воситаларни реализация қилиш пайтида мажбурий қайта баҳолаш қонун ҳужжатларида назарда тутилмаган.
Жавобни «Norma» МЧЖ экспертлари тайёрладилар.