МЧЖ муассиси – жисмоний шахс устав фондини кўпайтириш учун баҳоланган қиймати 3 500 млн сўм, кадастр қиймати 100 млн сўм бўлган бинони киритмоқчи.
Жисмоний шахс мол-мулкни МЧЖ устав фондига ҳисса сифатида берганда қиймат ошишидан даромад юзага келадими? Агар юзага келса, унга қандай ставкада солиқ солинади?
– Йўқ, муассисда қиймат ошишидан даромад юзага келмайди.
Жамият иштирокчилари томонидан жамиятнинг устав фондига (устав капиталига) қўшиладиган пулсиз ҳиссаларнинг пул баҳоси жамият иштирокчилари умумий йиғилишининг жамиятнинг барча иштирокчилари томонидан бир овоздан қабул қилинадиган қарори билан тасдиқланади. Чунончи, агар бошқа иштирокчилар кадастр қиймати 100 млн сўмга тенг бўлган бинони 3 500 млн сўмлик қийматда қабул қилишга рози бўлсалар, мазкур розилик қарор билан тасдиқланади.
Жисмоний шахсларнинг ЖШДС солинадиган даромад турлари Солиқ кодексининг 172–178-моддаларида белгиланган. Улар орасида «қиймат ошишидан даромад» дегани йўқ. Бинобарин, муассисда солиқ мажбуриятлари юзага келмайди.
Жавобни «Norma» МЧЖ экспертлари тайёрладилар.
