Ташкилотимиз 2018 йил бошида бетон ишлаб чиқарувчи янги импорт ускунани (Elkomix-135) ўз маблағлари ҳисобидан сотиб олди. ТИФ ТН бўйича товар коди – 8474 31 000 0. У 2018 йил III чораги бошида фойдаланишга жорий этилди.
Корхона янги импорт ускунани сотиб олган ва фойдаланишга жорий этган бўлса, ЯСТ бўйича имтиёз олишга ҳақли бўладими?
– Ҳа, агар бу янги технологик асбоб-ускуна бўлса, корхона ЯСТ бўйича имтиёзни қўллаши мумкин.
ЯСТ бўйича солиқ солинадиган база янги технологик асбоб-ускуналар олишга йўналтирилган маблағлар суммасига, бироқ солиқ солинадиган базанинг кўпи билан 25%ига камайтирилади (Солиқ кодексининг 356-моддаси 3-қисми). Имтиёзнинг қўлланилиши Маблағларни инвестицияга йўналтирувчи юридик шахслар томонидан имтиёзларни қўллаш тартиби тўғрисидаги низом (АВ томонидан 25.08.2017 йилда 2918-сон билан рўйхатдан ўтказилган) билан тартибга солинади.
Чиқарилган санадан бошлаб 3 йилдан ошмаган маҳсулот, ишлар ва хизматларни ишлаб чиқаришда бевосита иштирок этадиган машиналар, аппаратлар, қурилмалар, механизмлар янги технологик жиҳоз (асбоб-ускуна) деб тан олинади.
Ишлаб чиқарилган йилини тасдиқлаш учун:
● ёки олиб кирилаётган технологик асбоб-ускунанинг ишлаб чиқарилган санасини тасдиқлайдиган ишлаб чиқарувчи заводнинг техник паспорти;
● ёки ишлаб чиқарувчининг тегишли ахборот қайд этилган бошқа ҳужжати тақдим этилади.
ЯСТ бўйича имтиёз қайси маблағ ҳисобига (ўзининг ёхуд қарзга олинган маблағлар, шу жумладан лизинг) олинганидан қатъи назар тақдим этилади.
Солиқ солинадиган база янги технологик асбоб-ускуна фойдаланишга топширилган солиқ давридан эътиборан 5 йил ичида камайтирилади. Яъни корхона 2018 йилнинг 9 ойи учун ҳисоботда ЯСТ бўйича солиқ солинадиган даромадни камайтиришга ҳақли.
Фойдаланишга янгитдан киритилаётган янги технологик асбоб-ускуна бўйича имтиёзларни қўллаш учун Ягона солиқ тўлови бўйича ҳисоб-китобга (13-илова, АВ томонидан 22.03.2013 йилда 2439-сон билан рўйхатдан ўтказилган) Фойдаланишга киритилган янги технологик асбоб-ускуна тўғрисида маълумотнома Низомга иловага мувофиқ шакл бўйича илова қилинади.
Жавобни «Norma» МЧЖ экспертлари тайёрладилар.
