ХК 2.08.2021 йилдаги ЎРҚ-705-сон Қонунга асосан ходимларни ишдан четлаштиришга ҳақлими? Ходим вакцинацияга қарши кўрсатмага эга эканлигини қандай исботлаши мумкин?
– Қонун иш берувчига ходимни ишдан четлаштириш мажбуриятини юкламайди, балки бундай ҳуқуқни беради.
«Аҳолининг санитария-эпидемиологик осойишталигини таъминлашга йўналтирилган Ўзбекистон Республикасининг айрим қонун ҳужжатларига ўзгартиришлар ва қўшимчалар киритиш тўғрисида»ги Қонун (2.08.2021 йилдаги ЎРҚ-705-сон) қабул қилиниши муносабати билан ходимлари мажбурий вакцинациядан ўтадиган фуқаролар тоифасига киритилган барча корхоналар ва ташкилотлар (мулкчилик шаклидан қатъи назар), ходимларни вакцина олишга жалб қилиш бўйича ишларни ташкиллаштиришни бошлаб юборишга ҳақлидирлар.
Соғлиқни сақлаш вазирлигининг маълум қилишича, вакцинация қуйидаги график бўйича ўтказилади:
● вакцинанинг 1 дозаси 2021 йил 1 сентябрга қадар;
● 2 дозаси – 2021 йил 1 октябрга қадар;
● 3 дозаси – 2021 йил 1 ноябрга қадар олиниши лозим.
Аҳолининг санитария-эпидемиологик осойишталиги хизматининг қарори (АВ рўйхат рақами 31, 19.07.2021 й.) билан 14 тоифадаги ходимлар учун коронавирусга қарши мажбурий профилактик эмлаш ўтказилади.
Бугунги кунда вакцинацияга қарши кўрсатмалар тўғрисидаги маълумотнома (ҳужжат) шакли қонунан тасдиқланмаган. Ҳозирча ходимнинг яшаш жойидаги даволаш муассасасидан берилган, қарши кўрсатма муддати белгиланган маълумотнома-хулосанинг ўзи етарли деб ўйлаймиз, сабаби қарши кўрсатма вақтинчалик ёки доимий бўлиши мумкин.
Қонунда ходим вакцина олишдан бош тортганлиги учун ишдан четлаштирилиши тартиб-таомили аниқ кўрсатилмаган, шу боисдан «аниқлаштирувчи» бошқа норматив-ҳуқуқий ҳужжатлар чиқишини кутиш лозим. Бунинг устига вакцинациянинг 1-босқичи 1 сентябрга қадар давом этади. Ишни вакцина олган ходимлар тўғрисидаги маълумотларни таҳлил қилиш ва тўплашдан, бундай ишларни ўтказиш учун локал ҳужжатларни ишлаб чиқишдан (буйруқ чиқариб, уни ходимларга эълон қилиш, вакцина олиш зарурлиги тўғрисидаги хабарномани имзо чектириб ходимларга топширишдан) бошлашни тавсия қиламиз.
Валерия Ляндрес,
кадрлар хизмати ходими.
