Қурилиш компанияси 2019 йилда 2 блокдан иборат турар жой қуришни бошлаган. 2020 йилда ёрдамчи пудратчи ташкилот иккита блок учун бажарилган қурилиш ишлари далолатномасини қисман тақдим этган. Фақат битта А блок учун кадастр ҳужжати олинган. 2021 йилда А блоки бўйича квартиралар олди-сотдисини расмийлаштиришни бошладик. Ҳозир қурилиш ишлари давом этмоқда. Айни пайтда биз бажарилган ишлар далолатномасига кўра ҳар бир блок бўйича қурилиш ишларига оид харажатларни тақсимлаб чиқдик. Юкхат бўйича бошқа харажатлар ҳар бир блок майдонига мутаносиб равишда тақсимланди.
Кадастр ҳужжатлари мавжуд бўлган, бироқ қурилиш ишлари ҳали якунланмаган А блоки бўйича қанча майдонни кирим қилишни қандай тўғри аниқлаш мумкин? Квартиралар таннархи қандай аниқланади?
– Қурилиш тугалланган ва белгиланган тартибда фойдаланишга қабул қилинган бинолар ва иншоотларга бўлган ҳуқуқ давлат рўйхатидан ўтказилиши лозим.
Қурилиши тугалланмаган бинолар ва иншоотларга бўлган ҳуқуқ уларнинг қурилиши тегишли лойиҳа ташкилоти томонидан бошланганлиги тасдиқланган тақдирда давлат рўйхатидан ўтказилиши мумкин.
Қурилиши тугалланмаган бино ва иншоотларни давлат рўйхатидан ўтказиш қуйидаги ҳолатларда амалга оширилади:
● ер участкасига бўлган ҳуқуқ белгиланган тартибда рўйхатдан ўтказилган бўлса;
● қурилиш қонун ҳужжатларига мувофиқ тасдиқланган лойиҳага асосан бошланган бўлса (Низомнинг 35-б., ВМнинг 29.12.2018 йилдаги 1060-сон қарорига 1-илова).
Корхона А блокка кадастр ҳужжатларини олган бўлса, демак, ушбу блокнинг бутун майдони қурилиши тугалланган объект сифатида кирим қилинади. Квартиралар таннархини ҳисобга олиш нархлари бўйича (смета бўйича) аниқлашга тўғри келади. Қурилиш якунланганидан кейин ҳақиқий таннархдан келиб чиққан ҳолда таннархга тузатиш киритилиши лозим.
Азизахон ТОШХЎЖАЕВА, «Norma» МЧЖ эксперти.