Солиқ инспекцияси 31.10.2019 йилда талабнома юбормасдан, ҳисобрақамимиздан 30 992 000 сўмни ҚҚС бўйича боқиманда сифатида ечиб олди. Солиқ бўйича тўлиқ ҳисоб-китобни тақдим этдик ва уларнинг ҳаракати ноқонуний эканлигини билдирдик (буни шахсан бориб ва шахсий кабинет орқали бир неча марта амалга оширдик). 10.12.2019 йилда ДСИ томонидан хулосага (бизга тақдим этилмади) биноан 11 056 000 сўм қайтарилди. Телефон қўнғироқларига ДСИ жавоб бермайди, инспектор уларнинг ҳаракатларини тушунтириб бера олмайди. 13.12.2019 йилда ўз ҳаракатларини тушунтириб беришларини сўраб, шахсий кабинет орқали сўров юбордик.
Бу вазиятга ойдинлик киритиш учун қаерга мурожаат қилиш керак?
– Ҳар бир солиқ тўловчи давлат солиқ хизмати органларининг қарорлари, улар мансабдор шахсларининг ҳаракатлари ёки ҳаракатсизлиги устидан шикоят бериш учун давлат солиқ хизматининг юқори турувчи органига (юқори турувчи мансабдор шахсига) ёки судга мурожаат қилиш ҳуқуқига эга (эски таҳрирдаги Солиқ кодексининг 122-моддаси). Шикоят қилиш тартиби янги таҳрирдаги Солиқ кодексининг 230-236-моддаларида белгиланган.
Замира Жўраева,
«Norma» МЧЖ эксперти.
