Ходим 2019 йил 22 апрель куни соат 8.00 да поездда Самарқандга хизмат сафарига жўнаб кетди. У ерга соат 10.00 да етиб борди. 23 апрель куни соат 6.00 да қайтиш учун поездга ўтириб, соат 9.00 да Тошкентга етиб келди.
Ходим 1 сутка ва 1 соат хизмат сафарида бўлганда, унга неча кун учун суткалик пуллар берилади?
– Ўзбекистон Республикаси ҳудудидаги хизмат сафарлари тўғрисида йўриқномага (АВ томонидан 29.08.2003 йилда 1268-сон билан рўйхатдан ўтказилган) мувофиқ хизмат сафарига чиқиш куни бўлиб транспорт воситасининг соат 24 соатгача жўнаш куни, келиш куни эса – транспорт воситасининг доимий иш жойига келиш куни ҳисобланади (Йўриқноманинг 6-банди).
Сизнинг ҳолатда бу 22 ва 23 апрель – 2 кун.
Суткалик харажатлар жамоа шартномалари, жамоа келишувлари ва меҳнат шартномаларида назарда тутилган миқдорларда, лекин қуйидаги миқдорлардан кам бўлмаган ҳолда белгиланади (республика бўйича ўрнатилган энг кам ойлик иш ҳақига нисбатан коэффициентларда):
Тошкент шаҳрида, шаҳарлар – вилоятлар марказларида – 0,1;
бошқа шаҳарлар ва аҳоли яшайдиган пунктларда – 0,08 (Йўриқноманинг 11-банди).
Яъни жўнаш куни учун ҳам, келиш куни учун ҳам суткалик пулларни ҳисоблаш лозим.
Жавобни «Norma» МЧЖ экспертлари тайёрладилар.
