Юртимиз божхона чегаралари орқали ҳаракатланаётган ҳар бир шахс ва товар-моддий бойликлар божхона органлари ходимларининг эътиборидан четда қолмаслиги табиий. Аммо баъзи «содда ишбилармон»лар божхоначиларнинг кўзини шамғалат қилишдан ўзларини тия олмайдилар.
Бухоро вилояти «Олот» чегара божхона пости ходимлари катта миқдордаги товар-моддий бойликларни қонунга хилоф тарзда олиб ўтишга бўлган уринишларни бартараф қилишди. Бунда мазкур постга ўрнатилган замонавий мобиль сканер қурилмаси уларга беминнат хизмат кўрсатмоқда, дея хабар беради ДБҚ Ахборот хизмати Телеграммдаги расмий ахборот каналида (https://t.me/customschannel).
Хорижий давлатдан кириб келган чет эл фуқароси бошқарувидаги юк автомашинаси тўхтатилиб, йирик ҳажмдаги юк автотранспорт воситалари учун мўлжалланган инспекцион кўрик мажмуаси орқали кўздан кечирилганда, унга ортилган юклар билан юк-кузатув ҳужжатларида кўрсатилган маълумотлар ўртасида номутаносиблик юзага келди.
Божхона кўриги давомида маълум бўлишича, автомашинага юк-кузатув ҳужжатларида умуман кўрсатилмаган умумий қиймати 2,3 млрд сўмдан ортиқ бўлган 6,3 тонна оғирликдаги 16 минг 876 дона эркаклар жемпери ва свитерлари ортилган экан. Қарангки, ушбу товарлар ҳужжатларда «эркаклар коржомаси» дея кўрсатилган.
Товарларнинг номи ва тегишли кодларини шу тарзда алмаштириш орқали «ишбилармон»лар аслида давлат бюджетига ундирилиши лозим бўлган божхона тўловларидан бўйин товлашга уринишган. Чунончи, агар ҳужжатларга ишонилганда, уларда кўрсатилган эркаклар коржомасини эркин муомалага чиқариш учун тадбиркор 109 млн сўм атрофида божхона тўловларини тўлар эди. Лекин божхона кўриги натижасида аниқланган эркаклар жемпери ва свитерлари учун ҳисобланган божхона тўловлари 697 млн сўмдан ортиқ суммани ташкил этган.
Инспекцион кўрик мажмуаси орқали рентген назоратидан ўтказилган яна бир юк автомашинасининг экрандаги тасвири божхоначиларни шубҳалантириб қўйди: чет эл фуқароси бошқарувидаги автомашинага зич тарзда, айқаш-уйқаш қилиб жойлаштирилган юклар белгиланган тартибда ва холислар иштирокида кўздан кечирилганида, ҳужжатларда кўрсатилганидан ортиқча 181,2 млн сўмлик 1,5 тонна оғирликдаги салкам 147 минг дона ручка борлиги маълум бўлди.
Ҳозирда мазкур ҳолатлар юзасидан божхона текширувлари давом эттирилмоқда.
Давлат божхона қўмитаси Ахборот хизмати.
