2017 йил февралда компания қўшимча келишувга биноан импорт контракти бўйича ўзаро ҳисоб-китобларни биржа (ҲККП) орқали сўмда амалга оширадиган бўлди. Президентнинг 29.09.2017 йилдаги ПҚ-3295-сон қарори эълон қилиниши билан контракт бўйича тўлов тўхтатиб қўйилди.
Биржада рўйхатдан ўтказилган сўмдаги контракт бўйича қарздан воз кечиш шартномасини тузиш мумкинми?
О.Сальникова, бош бухгалтер.
– Ҳа, қарздан воз кечиш тўғрисида келишув (шартнома) тузиш мумкин.
Кредитор қарздорни унинг зиммасидаги мажбуриятлардан, агар бу ҳол бошқа шахсларнинг кредитор мол-мулкига нисбатан ҳуқуқларини бузмаса, озод қилиши мумкин. Бунда қарздорнинг мажбурияти бекор бўлади (ФКнинг 348-моддаси).
Бу ҳолда контракт томонлари қарздан воз кечиш тўғрисида келишув (шартнома) тузишлари лозим, унинг доирасида импорт контракти бўйича тўлов мажбурияти бекор бўлади.
Импорт контракти бўйича қарз суммаси контракт юзасидан қарздор компаниянинг даромади ҳисобланган, текин олинган мол-мулк деб тан олинади (Солиқ кодексининг 135-моддаси). Шу муносабат билан компанияда солиқ оқибатлари юзага келади. У белгиланган солиқ солиш тартибига қараб ЯСТ ёки фойда солиғи тўлаши керак бўлади.
Александр Лобанов, «Norma» МЧЖ эксперти.
