Ташкилотимиз ходими ўз хоҳишига кўра ишдан бўшади. Меҳнат шартномаси бекор қилинаётганда ишдан бўшаш кунида у билан ҳисоб-китоб қилинди ва фойдаланилмаган таътил учун компенсация тўланди.
Кейинги иш куни мазкур шахс ташкилотимизга бошқа лавозимга ишга қабул қилинди.
Иш берувчининг хатти-ҳаракатларида ҳуқуқбузарлик мавжудми?
С.Олимов.
– Йўқ, мавжуд эмас.
Ходим номуайян муддатга тузилган меҳнат шартномасини ҳам, муддати тугагунга қадар муддатли меҳнат шартномасини ҳам, 2 ҳафта олдин иш берувчини ёзма равишда огоҳлантириб, бекор қилишга ҳақлидир (МКнинг 99-моддаси).
Огоҳлантириш муддати тугагандан сўнг ходим ишни тўхтатишга ҳақли, иш берувчи эса, ходимга меҳнат дафтарчасини бериши, фойдаланилмаган барча йиллик асосий ва қўшимча таътиллар учун пуллик компенсация тўлаши ва у билан ҳисоб-китоб қилиши шарт (МКнинг 110-моддаси, 151-моддаси 1-қисми).
Одатда, охирги иш куни меҳнат шартномаси бекор қилинган кун деб ҳисобланади (МКнинг 107-моддаси).
Келаси куни мазкур ходим худди шу ташкилотга ишга қабул қилингани аҳамиятга эга эмас, сабаби МКнинг 110-моддаси талабларига мувофиқ меҳнат шартномаси бекор қилинган кунда ходимга тегишли иш ҳақини тўлаш (унинг миқдори хусусида низо бўлмаса) мажбуриятини иш берувчидан соқит қилмайди.
Шу тариқа, иш берувчининг ушбу хатти-ҳаракатлари юзасидан муайян чекловлар мавжуд эмаслиги муносабати билан мазкур вазият меҳнат тўғрисидаги қонун ҳужжатларига зид келмайди.
Абдусалом Рисқуллаев, «Norma» МЧЖ бош эксперти.