Компаниямизда дресс-код йўқ, бироқ мижозларга хизмат кўрсатувчи ходимлар одатда батартиб кийинадилар.
Ёзги пайтда эса ҳамма истаганча кийиниб келади: эгниларида шорти, футболка, калта юбка, шиппак ёки кроссовкани кўриш мумкин.
Директор қўриқчиларга бундай ходимларни офисга қўймаслик, бухгалтерияга эса прогуллари ҳақини тўламаслик ҳақида оғзаки кўрсатма берган.
Директор тўғри йўл тутяптими?
П.Новикова.
– Йўқ, нотўғри, сабаби иш берувчида бунга асос йўқ.
Дресс-код нима ўзи? Бу кийим-бош шакли ва уни кийиш принциплари демак.
Сўз бирикмаси инглизча dress-code сўзидан олинган бўлиб, «кийиниш кодекси» маъносини англатади (dress – кийим, code – қоида, кодекс).
Шу тариқа, дресс-код қоидалари одатда компания корпоратив маданияти ҳисобланиб, унинг брендининг муҳим қисми сифатида белгиланади.
Иш берувчи ходимларнинг вакиллик органи фикрини ҳисобга олган ҳолда локал норматив ҳужжат қабул қилиши мумкин. У ёзги пайтдаги дресс-код тўғрисида низомни тасдиқлаши ва амалга киритилиши санасини кўрсатган ҳолда унинг тасдиқланганлиги тўғрисида буйруқ чиқариши лозим.
Шунингдек иш берувчи меҳнат муносабатлари жараёнидаги янги ахлоқ қоидалари ҳақида ҳар бир ходимни камида 2 ой олдин ёзма равишда огоҳлантириб тилхат олиши шарт. Кўрсатилган муддатни қисқартиришга фақат ходимнинг розилиги билан йўл қўйилади.
Фақат шундан кейингина тасдиқланган низом талабларини бажармаганлик учун ходимларга нисбатан интизомий таъсир чоралари қўлланилиши ёки ходим билан меҳнат шартномаси у янги меҳнат шартлари асосида ишлашни давом эттиришни рад этганлиги сабабли бекор қилиниши мумкин, бунда унга ўртача ойлик иш ҳақидан кам бўлмаган миқдорда ишдан бўшатиш нафақаси тўланади (МКнинг 89, 178-моддалари).
Ходимларни локал норматив ҳужжатлар билан таништирмаслик меҳнат тўғрисидаги қонун ҳужжатларини бузиш ҳисобланади ва Маъмурий жавобгарлик тўғрисидаги кодекснинг 49-моддасига мувофиқ иш берувчи ЭКИҲнинг 2 бараваридан 5 бараваригача миқдордаги жарима кўринишида маъмурий жавобгарликка тортилишига олиб келиши мумкин.
Абдусалом Рисқуллаев, «Norma» МЧЖ бош эксперти.
