Ҳайдовчилик гувоҳномамни йўқотиб қўйдим. Дубликатни расмийлаштириш даврида автомобилни гувоҳномасиз бошқарсам бўладими?
Нишонов. Тошкент ш.
– Йўқ, мумкин эмас.
Ҳайдовчилик гувоҳномасининг дубликатини расмийлаштириш давомида бир ой муддат билан вақтинчалик рухсатнома берилади. Тасдиқловчи ҳужжатлар олингунга қадар вақтинчалик рухсатнома муддатини яна бир ойгача узайтириш мумкин (Низомнинг 70-банди, ВМнинг 2.08.2006 йилдаги 156-сон қарорига 1-илова).
Ҳайдовчилик гувоҳномаси йўқотилганда ҳайдовчи қуйидагиларни ёнида олиб юриши шарт:
► транспорт воситасини вақтинчалик бошқариш ҳуқуқини берувчи талонни;
► унинг шахсини тасдиқловчи ҳужжатни;
► транспорт воситаси ёки тиркамани қайд қилиш гувоҳномасини, транспорт воситасининг эгаси бўлмаган ҳолларда эса – умумий эгалик ҳуқуқини ёки тасарруф этиш ҳуқуқини берувчи, эгалик қилишга ва фойдаланишга берилганлигини тасдиқловчи ҳужжатни;
► транспорт воситаси эгасининг фуқаролик жавобгарлигини мажбурий суғурта қилиш бўйича суғурта полисини;
► қонунчиликда кўзда тутилган ҳолларда – йўл варақаси ва ташилаётган юкнинг ҳужжатларини (ЙҲҚнинг 7-банди, ВМнинг 24.12.2015 йилдаги 370-сон қарорига 1-илова).
«АвтоНорма» бўлимини мухбиримиз Алла Ромашко олиб боради.
