Улгуржи савдо билан шуғулланиш ҳуқуқини берувчи лицензия олиш учун Савдо департаменти темир-терсак топшириш нормасини йилига 10 тонна этиб белгилаган. Темир-терсак топширилмаса, лицензия берилмайди.
Савдо департаменти ходимлари металл конструкциялар ишлаб чиқаришга алоқаси бўлмаган компанияни улгуржи савдога лицензия олиш учун қора металл парчалари ва чиқиндиларини топширишга мажбур этишга ҳақлими?
С.Шапанова.
– Қонун ҳужжатларида лицензия олиш учун саволингизда кўрсатилган талаблар назарда тутилмаган (ВМнинг 5.11.2005 йилдаги 242-сон қарори билан тасдиқланган Низом).
Лицензия беришни рад этиш учун қуйидагилар асос бўлиши мумкин:
лицензия даъвогарининг ҳужжатларни лозим тарзда расмийлаштирмай тақдим этиши;
лицензия даъвогари тақдим этган ҳужжатларда нотўғри ёки бузиб кўрсатилган маълумотларнинг мавжудлиги;
► лицензия даъвогарининг лицензия талаблари ва шартларига, шунингдек танлов (тендер) шартларига номувофиқлиги («Фаолиятнинг айрим турларини лицензиялаш тўғрисида»ги Қонуннинг 17-моддаси).
Ўз навбатида қуйидагилар лицензия талаблари ва шартлари ҳисобланади:
► ЎзРнинг улгуржи савдо фаолиятини амалга оширишни тартибга солувчи қонун ҳужжатларига риоя қилиш;
► ЭКИҲнинг камида 3 500 баравари миқдорида, улардан ЭКИҲнинг камида 1 200 баравари миқдорида пул маблағлари билан шакллантирилган устав фондининг мавжуд бўлиши;
► мажбурий тартибда сертификатланиши керак бўлган товарлар сотилган тақдирда мувофиқлик сертификатлари ёки маҳсулот ишлаб чиқарувчи корхоналарда сертификатланганлиги тўғрисидаги маълумотлар ёхуд уларнинг нусхалари мавжуд бўлиши (Низомнинг 9-банди).
Бошқа асосларга кўра, шу жумладан, лицензия бериш мақсадга мувофиқ эмас деган важ билан лицензия беришни рад этишга йўл қўйилмайди («Фаолиятнинг айрим турларини лицензиялаш тўғрисида»ги Қонуннинг 17-моддаси 2-қисми).
Шу тариқа, лицензияловчи органнинг талабларини асоссиз деб ҳисоблаймиз, сиз лицензияловчи органнинг хатти-ҳаракатлари устидан судга ёки прокуратурага шикоят қилишга ҳақлисиз (ХПКнинг 24-моддаси 1-қисми 9-банди; «Фаолиятнинг айрим турларини лицензиялаш тўғрисида»ги Қонуннинг 17-моддаси 3-қисми; «Фуқароларнинг ҳуқуқлари ва эркинликларини бузадиган хатти-ҳаракатлар ва қарорлар устидан судга шикоят қилиш тўғрисида»ги Қонун).
Жўрабек Муротов, «Norma Online» эксперти.
