Дистрибьюторлик компаниямиз улгуржи савдо билан шуғулланади. Ягона солиқ тўлови тўлаймиз.
Декабрда товар таннархидан паст нархда сотилди.
Солиқ солинадиган базани белгилаш учун Ҳисоб-китобнинг 025-«Товарларни таннархидан паст нархларда реализация қилишдан ва текинга беришдан кўрилган зарарлар» сатрини тўлдириш чоғида йил бошидан ёки чорак учун товар обороти (90-ҳисобварақ) ва таннарх (91-ҳисобварақ) фарқини олиш керакми ёки фарқни юкхатлар бўйича ҳисоблаш лозимми?
ЯСТ ҳисоб-китобида товарларни таннархидан паст нархларда реализация қилишдан ва текинга беришдан кўрилган зарарларни қандай қилиб тўғри белгилаш лозим?
О.Корчагина,
МЧЖ бухгалтери.
– Солиқ кодексининг 355-моддасига мувофиқ товарларни (ишларни, хизматларни) реализация қилишдан тушган тушум деганда товарларни таннархидан ёки олиш баҳосидан паст баҳоларда реализация қилувчи юридик шахслар учун товарлар таннархи ёки уларни олиш баҳоси тушунилади.
Ягона солиқ тўлови ҳисоб-китобининг (МВ ва ДСҚнинг АВ томонидан 22.03.2013 йилда 2439-сон билан рўйхатдан ўтказилган қарорига 13-илова) 025-«Товарларни таннархидан паст нархларда реализация қилишдан ва текинга беришдан кўрилган зарарлар» сатри бўйича кўрсаткичи ҳар бир аниқ операция (ҳисобварақ-фактура) бўйича товарларни таннархидан паст нархларда реализация қилишдан ва текинга беришдан кўрилган зарарлар суммаси сифатида белгиланади.
Мазкур кўрсаткич ҳисоб-китоби умуман олганда қандайдир давр учун тўғри бўлмайди, зеро алоҳида операциялар бўйича реализацияга доир зарарлар бошқа сотишлар бўйича даромад билан қопланиши мумкин. Бунда ягона солиқ тўлови бўйича солиқ солинадиган база компания раҳбарияти томонидан бундай қарорлар қабул қилиниши туфайли камайиши керак эмас.
Лилия ХИСМАТОВА,
«Norma Profi» эксперти.
