Ходим билан меҳнат шартномаси болани 2 ёшга тўлгунча парвариш қилиш таътилида бўлган ходимнинг ишда йўқлиги вақтига тузилган.
2013 йил 20 декабрда вақтинчалик ходимни 23 декабрдан 27 декабргача хизмат сафарига юбориш тўғрисида буйруқ чиқарилди.
Асосий ходим 23 декабрда 24 декабрдан ишга чиқиши тўғрисида маълум қилди. Биз вақтинчалик ходим билан меҳнат шартномасини асосий ходим ишга қайтган кундан бекор қилишимиз керак. Бироқ агар вақтинчалик ходим хизмат сафаридан 27 декабрда қайтган бўлса, меҳнат шартномасини қачон бекор қилишимиз керак эди деган савол туғилади.
Б.Йўлдошева.
Бухоро шаҳри.
– Вазият осон эмас.
Агар ходим айни 24 декабрда таътилни муддатидан аввал тугатиш ва вақтинчалик ходим хизмат сафарига юборилган ва энди ҳеч нимани ўзгартириб бўлмайдиган ҳолатда ишга чиқиш нияти тўғрисида маълум қилган бўлса, асосий ходим билан ишни бошлаш санаси тўғрисида келишиш, хизмат сафарига юборилган ходимнинг қайтишини кутиш ҳамда унга ихтисослик ва малака бўйича бошқа мос лавозим таклиф этиш ёки меҳнат шартномасини асосий ходим ишга қайтган кундан бошлаб бекор қилиш керак эди.
Юқорида баён этилганларни ҳисобга олиб, асосий ходим билан келишиш ва тарафларнинг келишувига асосланиб ишга чиқиш санасини белгилаш керак холос.
