«Тошкент-Аэро» ИБК ходимлари томонидан бошқа ҳуқуқни муҳофаза қилувчи идоралар вакиллари билан ҳамкорликда тилла ва заргарлик буюмлари, нақд хорижий валюталар ва бошқа турдаги товар-моддий бойликларнинг ноқонуний олиб ўтилишига қарши кенг кўламли чора-тадбирлар олиб борилмоқда.
Амалдаги тартибларга мувофиқ, республикамиз фуқароларига 2 000 АҚШ доллари эквивалентидаги нақд хорижий валюталарни божхона баённомасида ёзма қайд этиш шарти билан республикамиздан олиб чиқиб кетишга рухсат этилади. Аммо Истанбулга парвоз олдидан пойтахтлик Ш.Насритдинованинг ушбу меъёрга қаноат қилмаслиги оқибатида божхона назоратидан яширган 9 800 АҚШ доллари билан “видолашишига” тўғри келди.
Жисмоний шахслар республикамизга умумий оғирлиги 30 граммдан ошмайдиган қимматбаҳо металл ва қимматбаҳо тошлардан ясалган 5 тагача заргарлик буюмларини олиб киришлари мумкинлигини А.Касимов “унутган” кўринади. Бу унутиш унга қимматга тушди: амалдаги тартибларга зид тарзда ва яширин равишда олиб киришга урингани сабаб унинг қиймати 21,6 млн сўмдан ортиқ салкам 0,7 кг оғирликдаги тилла ва заргарлик буюмлари энди ўрнатилган тартибда давлат фойдасига мусодара қилинади.
“Шаржа-Тошкент” йўналишида парвозини якунлаган С.Юнусовга эса кашандалиги панд берди. У амалдаги тартибларга кўра рухсат этилган 10 қути ўрнига 500 қути «Parliament» сигареталарини божхона баённомасида ва божхона ходимининг оғзаки сўрови пайтида маълум қилмасдан туриб олиб киришга уринган экан.
Божхона чегарасини кесиб ўтаётган шахс айнан бир хил товарни ўзи ва оила аъзоларининг эҳтиёжларидан ошиб кетувчи миқдорда олиб келаётган бўлса, демак, у тижорат мақсадларини кўзлаётган бўлади. Тижорат мақсадида олиб кирилаётган товарлар учун эса ўрнатилган тартибда тўланиши лозим бўлган божхона тўловлари ва тақдим этилиши керак бўлган ҳужжатлар А.Исраиловга малол келди. Ҳар ҳолда Бангкокдан қайтаётиб, у божхона назоратидан яширилган қиймати 1,5 млн сўмдан ортиқ 176 дона ананас тропик меваларини фақат ўз оиласи дастурхони учун олиб келмаётгани аниқ эди.
Жорий йилнинг ўтган 9 ойи мобайнида “Тошкент-Аэро” ИБК ходимлари томонидан бошқа ҳуқуқни муҳофаза қилувчи идоралар вакиллари билан ҳамкорликда аниқланган 940 та қонунбузарлик ҳолатларида 5,7 млрд сўмдан ортиқ қийматдаги товар-моддий бойликларнинг ноқонуний олиб ўтилишига чек қўйилди.
“Тошкент-Аэро” ИБК
Ахборот хизмати.
