Ёшга доир эмас, балки бошқа турдаги пенсия ҳисобланиши учун стаж қанча бўлиши керак?
– Пенсиянинг 3 тури мавжуд: ёшга доир пенсия ёки, одатда, кексалик пенсияси деб аталади, ногиронлик пенсияси ва боқувчисини йўқотганлик пенсияси («Фуқароларнинг давлат пенсия таъминоти тўғрисида»ги Қонуннинг 2-м.).
Ёшга доир пенсия олиш ҳуқуқига эркаклар 60 ёшга тўлганда ва иш стажи камида 25 йил бўлган тақдирда, аёллар 55 ёшга тўлганда ва иш стажи камида 20 йил бўлган тақдирда эга бўладилар (Қонуннинг 7-м.).
Пенсия тайинлаш учун етарлича иш стажига эга бўлмаган шахсларга ёшга доир пенсиялар Қонуннинг 37-моддаси биринчи қисми «а», «б», «в» ва «г» кичик бандларида назарда тутилган камида 7 йил иш стажи мавжуд бўлган тақдирда, бор стажга мутаносиб миқдорда тайинланади (Қонуннинг 7, 8, 29-м.).
Ногиронлик пенсиялари қонун ҳужжатларида белгиланган тартибда I ва II гуруҳ ногиронлари деб топилган шахсларга, шунингдек Чернобиль АЭСдаги авария оқибатида шикастланган ёки касалликка чалинганлиги туфайли III гуруҳ ногиронлиги белгиланган шахсларга тайинланади (Қонуннинг 15-м.).
Вафот этган боқувчининг қарамоғида бўлган меҳнатга қобилиятсиз оила аъзолари боқувчисини йўқотганлик пенсияси олиш ҳуқуқига эга бўлади (Қонуннинг 20-м.).
Маълумот учун!
Боқувчисини йўқотганлиги муносабати билан оиланинг меҳнатга лаёқатсиз аъзоларига пенсия олувчи ПЕНСИОНЕР оила аъзолари таркибининг ЎЗГАРГАНЛИГИ, улар ўқишни тугатганлиги, шунингдек тўлиқ давлат таъминотига ўтганлиги ҲАҚИДА Пенсия жамғармаси бўлимига маълум қилиши ШАРТ.