ҚҚС тўловчи корхона аукцион орқали кейинчалик 2 йил муддатга ўзлаштириш учун бўш турган ер участкасини сотиб олди. Ер участкаси сотиб олинган суммага баённома мавжуд, у давлат мулки олди-сотди шартномасига тенглаштирилади. Давлат мулкини сотиб олувчи солиқ агенти сифатида ҚҚСни ҳисоблаши ва бюджетга тўлаши лозимлиги боис, биз ҚҚСни тўлаб бердик.
Корхона ушбу ҚҚС суммасини ҳисобга олишга ҳақлими?
– Ҳа, корхона давлат мулкини сотиб олишда солиқ агенти сифатида тўлаган ҚҚС суммасини ҳисобга олишга ҳақли.
Ўзбекистон Республикаси ҳудудида давлат мол-мулки реализация қилинганда (берилганда) солиқ базаси солиқ агенти томонидан аниқланади. Бундай ҳолларда ушбу мол-мулкнинг харидорлари (уни олувчилар) солиқ агенти деб эътироф этилади, бундан якка тартибдаги тадбиркор бўлмаган жисмоний шахслар мустасно. Бундай ҳолларда солиқ базаси сотиб олинаётган (олинаётган) давлат мол-мулкининг ҚҚС ҳисобга олинмасдан шартномада белгиланган қиймати миқдорида солиқ агенти томонидан аниқланади (СК 256-м. 2-қ.).
ҚҚС тўланганлигини тасдиқловчи тўлов топшириқномаси корхонангизга тўланган солиқ суммасини ҳисобга олиш ҳуқуқини беради (СК 256-м. 6-қ.).
Азизахон ТОШХЎЖАЕВА, «Norma» МЧЖ эксперти.