Корхона – ЯСТ тўловчиси йирик суғурта компаниясининг устав фондида улушга эга. У ўз улушини Туркия компаниясига бозор қиймати бўйича сотиш учун олди-сотди шартномасини тузди, бозор қиймати мустақил баҳоловчи компания томонидан аниқланди. Улушнинг баланс қиймати баҳолаш қийматидан паст. Ҳисоб-китоб счётига АҚШ доллари эквивалентида улуш келиб тушган.
Бошқа корхонанинг УФдаги улушини сотиш қандай солиқ оқибатларига олиб келади?
– Асосий воситалар ва бошқа мол-мулк чиқиб кетишидан олинадиган даромадларни ўз ичига оладиган ялпи тушум ЯСТ солинадиган объект ҳисобланади (Солиқ кодексининг 132-моддаси 1-банди, 133-моддаси, 355-моддаси 2-қисми 2-банди). Ўз навбатида, корхонангиз эгалик қиладиган, фойдаланадиган, тасарруф эта оладиган бошқа корхонанинг устав фондидаги улуш корхонангиз мол-мулки ҳисобланади (Солиқ кодексининг 22-моддаси).
Бунда муассислар таркибидан чиқилаётганда устав фондига ҳиссалар доирасида олинган маблағлар ЯСТ солинадиган объект сифатида қаралмайди (Солиқ кодексининг 355-моддаси 5-қисми 2-банди).
Сизнинг ҳолатда улушни сотишдан олинган бошқа даромад ЯСТ бўйича ялпи тушум таркибига киритилади ҳамда ҳисса (баланс қиймати) суммаси ва улуш сотиладиган сумма ўртасидаги фарқ кўринишида қуйидаги формула орқали аниқланади:
Улушни сотишдан олинган бошқа даромад = Устав фондидаги улушнинг сотиш қиймати – Устав фондидаги улушнинг баланс қиймати.
Жавобни «Norma» МЧЖ экспертлари тайёрладилар.
