Бир масалага ойдинлик киритсангиз. Фирма Ўзбекистон Республикаси ҳудудига олиб киришда импорт божхона божи ва қўшилган қиймат солиғидан озод қилинадиган технологик жиҳозлар рўйхатига (АВ томонидан 20.03.2013 йилда 2436-сон билан рўйхатдан ўтказилган) кирадиган техникани олиб киришда божхона тўловлари бўйича имтиёздан фойдаланди. Баъзи ҳолатлар туфайли ушбу жиҳозларнинг бир қисмини сотиш зарурати юзага келди. Унинг учун илгари берилган имтиёз сабабли тўланмаган божхона тўловларини қанча миқдорда қайтариш лозим бўлади?
– Ушбу саволга жавоб Ишлаб чиқаришни модернизациялаш, техник ва технологик қайта жиҳозлаш, ишлаб чиқаришни янги қурилиш шаклида кенгайтириш, ишлаб чиқариш эҳтиёжлари учун фойдаланиладиган бинолар ва иншоотларни реконструкция қилишни амалга оширувчи хўжалик юритувчи субъектлар томонидан имтиёзларни қўллаш тартиби тўғрисида низомнинг (МВ, ИВ, ДСҚ ва ДБҚнинг АВ томонидан 11.06.2007 йилда 1688-сон билан рўйхатдан ўтказилган қарори билан тасдиқланган) III бўлимида берилган. Унинг 22-бандига кўра божхона тўловлари бўйича имтиёзлар фақатгина импорт қилинган технологик жиҳоз олиб кирилган пайтдан эътиборан 3 йил ичида экспортга реализация қилинган ёки бепул берилган тақдирда бекор қилинади. Бунда тўланиши лозим бўлган тўловларни тўлаш бўйича мажбурият технологик жиҳозни экспорт қилувчига юклатилади. У технологик жиҳозни импорт қилишда божхона расмийлаштируви амалга оширилган БЮД нусхасини божхона органларига тақдим этиши шарт.
У Ўзбекистон ҳудудида реализация қилинган ёки бепул берилган тақдирда божхона тўловларини тўлаш бўйича мажбуриятлар юзага келмайди (Низомнинг 23-банди). Бунда бераётган томон (импортчи, сотувчи, эгаси) харидорга технологик жиҳозни импорт қилишда божхона расмийлаштируви амалга оширилган БЮД нусхасини тақдим этиши шарт.
«Божхона» бўлимини махсус мухбиримиз
Гулнора АБДУНАЗАРОВА олиб боради.
