Корхонамиз (ХХТУТ бўйича коди – 21240) Самарқанд туман ҳудудида рўйхатдан ўтказилган бўлиб, ягона ер солиғини тўлар эдик. Самарқанд шаҳри кенгайтирилгач, бизнинг манзил шаҳар ҳудудига ўтказилди. Самарқанд шаҳар солиқ хизмати ходимлари шаҳарда ягона ер солиғи тўланмайди деб бизни ягона солиқ тўловига ўтказишмоқчи. Шу тўғрими?
– Ягона ер солиғини тўлаш учун корхонанинг жойлашган ҳудуди эмас, балки Солиқ кодексининг 362-моддасида келтирилган талаблар инобатга олиниши керак бўлади, жумладан:
– қишлоқ хўжалиги товарлари ишлаб чиқарувчилар;
– қишлоқ хўжалиги йўналишидаги илмий-тадқиқот ташкилотларининг тажриба-экспериментал хўжаликлари ва таълим муассасаларининг ўқув-тажриба хўжаликлари.
Бир вақтнинг ўзида қуйидаги шартларга жавоб берадиган юридик шахслар солиқ солиш мақсадида қишлоқ хўжалиги товарлари ишлаб чиқарувчилар жумласига киради:
ер участкаларидан фойдаланган ҳолда қишлоқ хўжалиги маҳсулотини етиштириш ва ўзи етиштирган мазкур маҳсулотни қайта ишлаш ёхуд ер участкаларидан фойдаланган ҳолда фақат қишлоқ хўжалиги маҳсулотини етиштириш асосий фаолият тури бўлган юридик шахслар;
қишлоқ хўжалигини юритиш учун маҳаллий давлат ҳокимияти органлари томонидан ўзларига белгиланган тартибда берилган ер участкаларига эга бўлган юридик шахслар;
қишлоқ хўжалиги маҳсулотини етиштириш ва ўзи етиштирган мазкур маҳсулотни қайта ишлаш улуши реализация қилиш ёки қайта ишлаш учун олинган қишлоқ хўжалиги маҳсулотини ўз ичига олувчи қишлоқ хўжалиги маҳсулотини етиштириш ва қайта ишлаш умумий ҳажмида камида 50 фоизни ташкил этадиган юридик шахслар.
Демак, сиз юқоридаги талабларга бир вақтнинг ўзида жавоб берсангиз, ягона ер солиғини тўловчиси бўлишингиз мумкин. Акс ҳолда ягона солиқ тўловини ёки умумбелгиланган тартибдаги солиқларни тўлайсиз.
Жавобни экспертимиз Умидбек САФАРОВ
тайёрлади.
