2026 йил 1 февралдан бошлаб пойтахтдаги пуллик автотураргоҳлар яқинида жойлашган кўп квартирали уйлар ва маҳаллалар аҳолиси ўз автомобилини тунги вақтда қўйганлик учун ҳақ тўламаслиги мумкин. Бунинг учун улар бундай имкониятдан фойдаланишга рухсат берувчи резидентлик рухсатномасини расмийлаштиришлари керак бўлади. Ушбу вақтда автомобилларни пуллик тўхташ жойларига бепул жойлаштириш тартиби Тошкент шаҳар ҳокимининг 2025 йил 16 октябрдаги қарорига киритилган ўзгартиришлар билан белгиланган. Янги тартиб қандай ишлайди?
1. Резидентлик рухсатномаси нима?
Бу «Электрон ҳукумат» тизимидаги Тошкент шаҳри резидентларининг тўхташ жойларига рухсатномалар реестридаги электрон ёзувдир. У белгиланган тўлов асосида 20.00 дан 08.00 гача автомобилни пуллик автотураргоҳга бепул жойлаштириш ҳуқуқини беради. Қолган вақтларда тўхташ жойи учун тўлов қилишга тўғри келади.
2. Бундай рухсатномани ким расмийлаштириши мумкин?
Пуллик тўхташ жойларига яқин уйларда ёки маҳаллаларда яшовчи жисмоний шахслар (резидентлар) – транспорт воситаларидан фойдаланувчилар резидентлик рухсатномасини олишлари мумкин. Улар кўчмас мулк эгаси бўлиши ёки пуллик автотураргоҳ ёнида жойлашган турар жойга эгалик қилиш улушига эга бўлиши керак. Ҳужжатни олиш учун аризани Ягона давлат хизматлари портали орқали топшириш мумкин.
3. Битта турар жой учун нечта резидентлик рухсатномасини олиш мумкин?
Бир турар жойга тунги вақтда автомобилни бепул қўйиш учун кўпи билан иккита рухсатнома олиш мумкин. У резидент номига ёки пойтахтда яшаш жойи бўйича расман рўйхатда турган шахслар номига расмийлаштирилади. Аҳоли ушбу тартиб юк машиналари ва ногиронлиги бўлган шахслар учун мўлжалланган махсус тўхташ жойларига татбиқ этилмаслигидан хабардор бўлиши керак.
4. Ҳужжатни олиш учун қанча тўлаш керак?
Йиллик резидентлик тўлови бир йўла тўланади ва БҲМнинг бир баравари (412 минг сўм)ни ташкил этади.
5. Ҳужжат қанча муддатга берилади ва у қандай узайтирилади?
Рухсатноманинг амал қилиш муддати электрон реестрга киритилган пайтдан бошлаб бир йилни ташкил этади. Узайтиришга ариза резидент томонидан амал қилиш муддати тугашидан камида 2 ой олдин ва 6 иш кунидан кечиктирмай берилади. Янги рухсатнома олдинги муддат тугаши биланоқ автоматик равишда кучга киради.
6. Агар тўланган давр олинган рухсатноманинг амал қилиш муддатидан ошиб кетса, нима қилиш керак?
Агар резидент йиллик тўловни тўлаган бўлса ва тўланган давр олинган рухсатноманинг амал қилиш муддатидан ошиб кетган бўлса, у ушбу фарққа, бироқ 14 календарь кундан кўп бўлмаган муддатга узайтирилади.
«Уй-жой-коммунал хўжалиги» бўлимини махсус мухбиримиз Ирина ГРЕБЕНЮК олиб боради